AQSh-ta bir kún ishinde 1000 altyn karta satyldy

AQSh-tyń Saýda mınıstri Govard Lıýtnıktiń málimdeýinshe, ol bir kún buryn árqaısysy 5 mıllıon dollar turatyn 1000 ımmıgratsııalyq «Altyn kartany» satqan. Bul týraly Kazinform agenttiginiń menshikti tilshisi habarlady.

AQSh-tyń Saýda mınıstri Govard Lıýtnık «All-In Podcast» baǵdarlamasynda sóz sóılep, álemde 37 mıllıon tabysty adamnyń «Altyn kartany» satyp alýǵa múmkindigi bar ekenin málimdedi. Prezıdent Donald Tramptyń pikirinshe, AQSh 1 mıllıon osyndaı kartany satyp, 5 trln dollar tabys taba alady.

— Álemde 37 mıllıon adam bul kartany satyp alatyn jaǵdaıy bar. Prezıdent biz mıllıonyn sata alamyz dep esepteıdi, — dedi Govard Lıýtnık.

Árqaısysy 5 mıllıon dollar turatyn «Altyn karta» baǵdarlamasy sheteldik azamattarǵa AQSh-ta turaqty turý quqyǵyn beredi jáne qoldanystaǵy EB-5 ınvestorlyq vızasynyń ornyna usynylyp otyr.

Protsesti ońtaılandyrý úshin Ilona Masktyń komandasy arnaıy baǵdarlamalyq platformany ázirlep jatyr, ol shamamen eki aptadan keıin iske qosylady.

— Búginnen bastap shamamen eki apta ishinde ol [baǵdarlama] qoldanysqa engiziledi. Ilon men úshin baǵdarlamalyq qamtamasyz etý ázirlep jatyr, sodan keıin ol iske qosylady, — dedi Govard Lıýtnık.

Buǵan deıin Tramp Kongreste ınflıatsııamen kúres sharalarynyń biri retinde «Altyn kartalardy» shyǵarý jáne satý bastamasyn kótergen bolatyn. Bul baǵdarlama tabysty adamdardyń AQSh-ta jumys oryndaryn ashyp, salyq tóleýine múmkindik bermek.