AQSh-ta bir aı ishinde myńnan astam sheteldik stýdenttiń vızasy joıyldy

ASTANA. KAZINFORM – Kóptegen stýdent vızalarynyń joıylýyna baılanysty Tramp ákimshiligin sotqa berdi. Bul týraly Anadoly habarlady. 

AQSh prezıdenti Donald Tramp ákimshiliginiń vızalar men turýǵa ruqsattardy joıý sharalary aıasynda, Palestınany qoldaıtyn ýnıversıtet stýdentterin qosa alǵanda, bir aı shamasynda myńnan astam sheteldik stýdenttiń quqyqtyq mártebesi men vızalary joıyldy.

Palestınany qoldaý maqsatynda AQSh-ta ótken narazylyqtarǵa qatysqan sheteldik azamattardyń, sonyń ishinde stýdentterdiń vızalary men turý ruqsattarynyń joıylýy týraly aqparattar buqaralyq aqparat quraldarynda keńinen jarııalanyp jatyr.

Associated Press (AP) agenttigi 160 ýnıversıtetten jınaǵan derekterge súıene otyryp jasaǵan esepke sáıkes, vızalardy joıý sharalary AQSh aýmaǵynda keń kólemde jalǵasyp jatyr.

Vızasy joıylǵan stýdentterdiń arasynda Úndistan men Qytaı azamattary jıi kezdesedi, sondaı-aq Gazadaǵy shabýyldarǵa qarsy shyqqan sheteldik stýdentter de bar.

Naýryz aıynda myńnan astam stýdenttiń vızasy men quqyqtyq mártebesi joıyldy. Olarǵa bul týraly elektrondyq poshta arqyly habarlanǵan.

AQSh-ta júzdegen stýdent vızalarynyń joıylý qaýpimen betpe-bet kelip otyr. Vızasy joıylǵan stýdentter elden shyǵarylýy múmkin.

Vızalary joıylǵan stýdentter ne sebepti mundaı sheshim qabyldanǵanyn bile almaı otyr.

Kóptegen stýden Tramp ákimshiligin sotqa berdi.

Federaldyq sýdıa Dartmýt ýnıversıtetiniń doktoranty Shıaotıan Lıýdiń quqyqtyq mártebesin qalpyna keltirý úshin vızany joıýǵa ýaqytsha tyıym salý týraly sheshim shyǵardy.

Montana shtaty ýnıversıtetiniń eki stýdentiniń de vızasy joıylǵan edi, biraq sot sheshiminen keıin olardyń quqyqtyq mártebesi qalpyna keltirilip, elden shyǵarylý qaýpi joıyldy.

30 qańtarda AQSh prezıdenti Donald Tramp «antısemıtızmge qarsy kúres» týraly jarlyqqa qol qoıdy. Bul qujat Palestınany qoldaǵan sherýlerge qatysqan stýdentterdi elden shyǵarýǵa múmkindik berdi.

27 naýryzda AQSh memlekettik hatshysy Marko Rýbıo «HAMAS-ty qoldaıdy» degen aıyppen 300-den astam sheteldik stýdenttiń vızasy joıylǵanyn málimdedi.

25 naýryz keshkisin Massachýsets shtatyndaǵy úıinen aýyzasharǵa bara jatqan kezde fılosofııa doktoranty Rıýmeısa Óztúrikti Immıgratsııa jáne keden qyzmetiniń (ICE) azamattyq kıimdegi qyzmetkerleri  ustap alyp ketken.

Buǵan deıin Kolýmbııa ýnıversıtetin jańa bitirgen palestınalyq belsendi Mahmýd Halıl de qamaýǵa alynǵan bolatyn.

Aıta ketelik AQSh-tyń Iemenge jasaǵan áýe soqqysynan qaza tapqandar sany 38-ge jetken edi.