AQSh-ta bortynda 279 jolaýshysy bar ushaq shuǵyl qonýǵa májbúr boldy
ASTANA. QazAqparat - Jeksenbi kúni Izraıldiń El Al áýe kompanııasynyń jolaýshylar ushaǵy Amerıkanyń Bıllıngs qalasynyń (Montana shtaty) halyqaralyq áýejaıynda tehnıkalyq aqaýlyǵy saldarynan májbúrli túrde qonýyna týra keldi.
Tel-Avıvten Los-Andjeleske (Kalıfornııa shtaty) ushqan Boeing-777 áýe kemesiniń ushqyshy qurylǵylardyń birinen oń jaq qozǵaltqyshty órt shalǵanyn kórsetetin belgini kórgende, qoný sheshimin qabyldady. Ushaq qonǵannan keıin áýejaı qyzmetkerleri ony qarap shyqty, biraq eshqandaı órtený belgilerin tapqan joq.
Ushaqtyń bortynda 279 jolaýshy men ekıpajdyń 20 múshesi boldy. Eshkim zardap shekken joq. Áýe kemesiniń qurylǵylaryn tehnıkalyq mamandar tekserýde, dep jazady TASS.
