AQSh-ta bir táýlikte koronavırýsqa qarsy vaktsınanyń tórt mılıonnan astam dozasy salyndy
VAShINGTON. QazAqparat – AQSh-tyń aýrýdy baqylaý jáne aldyn alý ortalyǵynyń málimetinshe sońǵy 24 saǵatta koronavırýsqa qarsy vaktsınanyń 4 mıllıonnan astam dozasy salyndy. Bul rette jeti kúndegi vaktsınatsııanyń ortasha kórsetkishi kúnine 3 mıllıonnan astam doza mólsherine jetti, dep habarlaıdy QazAqparat CNN-ge silteme jasap.
Eger adamdar maska taǵyp júrse, halyq kóp jınalatyn jerden aýlaq bolsa, vaktsınatsııa osyndaı qarqynmen jalǵasatyn bolsa, AQSh-taǵy ómir tezirek burynǵy qalypqa keledi, dedi prezıdent Djo Baıdenniń Covid-19 boıynsha bas medıtsınalyq keńesshisi doktor Entonı Faýchı.
«Bul pandemııa máńgilikke sozylmaıdy, óıtkeni kún saıyn 4 mıllıon, 3 mıllıon adam vaktsına alady, biz jaǵdaıdy baqylaýǵa jetip qaldyq. Taǵy biraz kútsek, vaktsına men vaktsınatsııa eldegi vırýstyń kóbeıýin jeńedi. «Vaktsınanyń» jeńetinine kúmán joq»,- dedi ol.
Ortalyqtyń málimetinshe, AQSh-ta Sovid-19-ǵa qarsy vaktsınanyń alǵashqy dozasy salynǵannan beri shamamen 109 kún ótti, sodan beri 104 mıllıon adam keminde bir dozadan aldy. Olardyń 59 mıllıonnan astamy tolyǵymen vaktsınalandy.
3 sáýirdegi jaǵdaı boıynsha AQSh-ta 161 mıllıonnan astam doza salynǵan. Juma kúninen beri salynǵan vaktsınalar sany 4 081 900 dozadan astam, jeti kúnde kúnine orta eseppen 3 072 500 doza egilgen.
AQSh-ta vırýsty 30,6 mıllıonnan astam adam juqtyrǵan, odan 554 522 adam qaıtys bolǵan. Sol sebepti de sarapshylar men sheneýnikter aýrýdyń yqtımal tórtinshi tolqynyna deıin halyqty vaktsınalaýǵa asyǵýda.
Avtor: Tatıana Kýdrenok
