AQSh-ta bıyl jumystan bosatylǵandar sany 1,1 mıllıonnan asty

ASTANA. KAZINFORM – AQSh-ta 2025 jyly jumystan bosatylǵandar sany 1,1 mıllıonnan asty, dep habarlaıdy FOX Business.

Jumys oryndaryn qysqartý pandemııadan bergi eń joǵary deńgeıge jetti. Bıylǵy qańtar-qarasha aralyǵynda jumys berýshiler 1 170 821 qyzmetkerdi qysqartý týraly málimdegen. Bul 2024 jyldyń dál osy kezeńimen salystyrǵanda 54 paıyzǵa kóp (sol kezde 761 358 adam jumystan qysqartylǵan).

Challenger dereginshe, 2025 jylǵy kórsetkishter 2020 jylǵy pandemııa kezeńinen (qańtar-qarashada 2 227 725 qysqartý) keıingi eń joǵary deńgeıge jaqyndaǵan. Sondaı-aq 2009 jyly retsessııa kezinde 1 242 936 adam, 2002 jyly 1 373 906 adam, 2001 jylǵy retsessııada 1 956 876 adam jumystan bosatylǵan edi.

Tek 2025 jyldyń qarasha aıynda ǵana amerıkalyq kompanııalar 71 321 adamdy qysqartatynyn habarlady. Bul qazan aıyndaǵy 153 074 adammen salystyrǵanda 53 paıyzǵa az. Alaıda kórsetkish 2024 jyldyń qarasha aıymen salystyrǵanda (57 727 adam) 24 paıyzǵa ósip, 2022 jyldan bergi eń joǵarǵy aılyq deńgeıge jetti.

Salalar boıynsha qarasha aıynda eń kóp qysqartý telekommýnıkatsııa sektorynda tirkeldi – 15 139 adam. Tehnologııalyq kompanııalar 12 377 adamdy qysqartty. Osylaısha IT salasynda 2025 jyly jalpy 153 536 adam jumystan bosatyldy, bul ótken jylmen salystyrǵanda 17 paıyzǵa joǵary.

Tamaq ónerkásibinde qarashada 6708 jumys orny qysqartyldy. 2025 jylǵy jıyntyq kórsetkish – 34 165 adam, bul ótken jylǵa qaraǵanda 26 paıyzǵa kóp.

Qyzmet kórsetý sektorynda qarasha aıynda 5509 adam jumystan bosatyldy. Jalpy alǵanda, bul salada 2025 jyly 69 089 qysqartý tirkeldi – byltyrǵydan 64 paıyzǵa artyq.

Buǵan deıin AQSh sheteldik azamattar úshin jumys isteýge ruqsat berý merzimin qysqartty.