AQSh-ta benzovoz 50-den astam kóliktiń apatqa ushyrýyna sebepshi boldy
ASTANA. QazAqparat - AQSh-tyń Baltımor qalasyndaǵy (Merılend shtaty) kópirden qulaǵan benzovoz kópirdiń astynan ótetin jolǵa baryp túsken. Sonyń saldarynan 2 adam mert bolyp, 15 adam zardap shekti, dep habarlaıdy Rıa Novostı.
Jergilikti CBS Baltimore telearnasynyń habarlaýynsha, osy apatqa keminde 50 kólik túsken. Zardap shekkenderdiń arasynda 3 adam aýyr dene jaraqattaryn alǵan. Mert bolǵandardyń arasynda benzovozdyń júrgizýshisi de bar.
Reıter agenttiginiń habarlaýynsha, kópirden qulaǵan soń avtotsısterna jarylǵan. Ondaǵan avtokólikter apat bolǵan jolda keptelip qaldy. Qaıǵyly oqıǵa AQSh-tyń shyǵys jaǵalaýy aımaǵynan ótetin eki joldyń qıylysqan tusynda jáne benzovoz ótip bara jatqan aımaqta, sondaı-aq Baltımordy aınalyp ótetin I-695 aınalmaly avtojolynyń boıynda boldy.
Apattyń saldary ázirge belgesiz. Alaıda ótken táýlikte osy aýdanda jańbyr jaýyp, kúnniń sýyǵynan muzǵa aınalǵan. Apatqa onyń da ózindik sebepteri bolýy múmkin degen boljam aıtylýda.
