AQSh-ta balalar arasynda koronavırýs juqtyrý jaǵdaılary kóbeıýde

NUR-SULTAN. QazAqparat – Amerıkanyń vaktsınalaý qarqyny tómen shtattarynda balalar arasynda koronavırýs juqtyrý jaǵdaılary edáýir kóbeıdi. Juqtyrǵandardyń kóbin aýrýhanaǵa jatqyzý qajet, kúnnen-kúnge kóbeıip jatqan balalardy ókpeni jasandy jeldetý apparatyna qosý kerek bolyp otyr. Balalar arasyndaǵy juqtyrý jaǵdaılarynyń kúrt ósýi jańa oqý jylynyń bastalýymen tikeleı baılanysty. Amerıka mektepterinde oqý jyly tamyzdan bastalady. Ata-analar mektepterde maska taǵý rejımin engizbegeni úshin gýbernatorlardy sotqa berip jatyr, dep habarlaıdy QazAqparat 1tv.ru saıtyna silteme jasap.

Jasóspirimder oqý jylyn mektepte emes, aýrýhanalarda bastap jatyr. Kóp shtattarda, ásirese Florıda shtatynda balalar arasynda koronavırýs juqtyrý jaǵdaılary kúrt ósýde. Olar aýyr jaǵdaıda aýrýhanalarǵa túsýde, ÓJJA-ǵa qosý qajettiligi týyndap jatyr.

«Pandemııa bastalǵan kezge qaraǵanda qazirgi kezde koronavırýs balalarǵa qaýip tóndirip tur», - dedi Florıda aýrýhanasynyń dárigeri Kennet Aleksandr.

Amerıkanyń pedıatrııa qyzmetiniń dereginshe, vaktsınalaý qarqyny tómen shtattardaǵy jaǵdaı asa aýyr. Florıda, Aıdaho, Alabama, Mıssısıpı, Kanzas shtattarynda koronavırýstyń «delta» shtamy tez taraýda.

«Kanzasta sońǵy aılary 12 jastan tómen balalar arasyndaǵy vırýs juqtyrý jaǵdaılary 690%-ǵa ósti. Jansaqtaý bólimderindegi naýqastardyń sany 275%-ǵa artty. Olardyń 20%-y – 12 jastan tómen balalar», - dep málimdedi pedıator-ınfektsıonıst Hose Romero.

Ata-analardyń aıtýy boıynsha, kóp jaǵdaıda aýrýdyń barysyn boljaý múmkin emes.

«Basynda ulym jeńil formada aýyrǵan. Odan keıin onyń jaǵdaıy tez nasharlap ketti. Bul qatty alańdatady, sebebi ári qaraı ne kúterińdi bilmeısiń», - dedi aýyryp jatqan balanyń ákesi Hýan Zaıas.

«Nıý-Iork Taıms» basylymynyń jazýynsha, balalardyń arasynda «sozylmaly COVID» belgileri baıqalady. Aýrýdyń belgileri qaıta bastaǵannan keıin eki apta nemese birneshe aıdan keıin qaıtadan oralyp jatady. Keıbir sımptomdar mı shaıqalý saldaryna uqsaıdy. Mysaly, keıbir balalar fızıkalyq belsendilikten keıin tez sharshap qalyp jatady. Keıbir naýqastardyń basy aınalyp, júrek soǵysy jıileıdi.

Konservator gýbernator-respýblıkalyqtar óz óńirlerinde memlekettik mekemelerde bólek zańdarmen maska taǵýdy mindetteýge tyıym saldy. Mysaly, kúndelikti juqtyrý jaǵdaılary boıynsha antırekord tirkelip otyrǵan Florıdanyń gýbernatory salynǵan tyıymǵa qarsy shyqqandardy jalaqysynan aıyramyn dep qorqytqan. Muǵalimdermen qosa ata-analar da narazy – Florıda men Kanzasta óńir basshylaryn sotqa berdi.

«Saıası oıyndardy oınaýdy qoıyp, pandemııa kezinde bizdiń balalarymyzdyń ómirlerin qaýipke tigýdi qoıý kerek», - dedi Veronıka MakLeın.

Maska taǵý rejımin quptaıtyndar Barak Obamaǵa da tıisti. Burynǵy prezıdent óziniń 60 jyldyq mereıtoıyn atap ótpek bolǵan. Alaıda áleýmettik jelige maskasyz kóńil kóterip júrgen júzdegen qonaqtardyń beınejazbalary tarap ketti.

Epıdemıologtar tolyq vaktsınalaý alǵan turǵyndardy da maska taǵýǵa shaqyrdy. Ekpe jasap úlgermegenderge vaktsına saldyrýǵa keńes berilýde. AQSh-tyń bas ınfektsıonısiniń aıtýynsha, jappaı vaktsınalaý pandemııanyń pessımıstik stsenarııiniń aldyn alýdyń birden bir tásili.

«Vırýsqa kóbeıýge múmkindik berip otyratyn bolsaq, ne bolady? Boljam boıynsha, vaktsınany da elemeıtin jańa myqty shtamm týýy múmkin», - dedi AQSh-tyń bas ınfektsıonısi Entonı Faýchı.

AQSh-tyq BAQ basty COVID-dıssıdent dep ataǵan Donald Tramptyń ózi FOX telearnasyna bergen suhbatynda amerıkalyqtardy ekpe saldyrtýǵa shaqyrdy.