AQSh-ta bala tárbıesine 300 000 dollardan artyq jumsalady

ASTANA. KAZINFORM – AQSh-ta 18 jasqa deıingi balany tárbıeleý quny 300 000 dollardan asty, bul 2025 jylmen salystyrǵanda shamamen 2%-ǵa kóp, dep habarlaıdy Kazinform agenttiginiń Vashıngtondaǵy tilshisi.

CBS News habarlaýynsha, LendingTree kompanııasynyń jańa baǵalaýy boıynsha, 2026 jyly bir balaǵa shaqqandaǵy shyǵyn 303 418 dollardy nemese jylyna orta eseppen 16 857 dollardy quraıdy. 

Esepteý salyq jeńildikterin eskere otyryp, AQSh-ta jylyna ortasha tabysy shamamen 100 000 dollar bolatyn erli-zaıyptylardyń tıptik shyǵyndaryna negizdelgen. Taldaý bala 18 jasqa tolǵanda aıaqtalatyndyqtan, oǵan ata-analar úshin taǵy bir úlken shyǵyn sanalatyn kolledj quny kirmeıdi. AQSh-ta kolledjdiń ortasha quny jylyna shamamen 38 000 dollardy quraıtynyn eskersek, bul jalpy shyǵyndy taǵy 152 000 dollarǵa arttyrýy múmkin. 

Amerıkalyq otbasylar balalardy tárbıeleýmen baılanysty qarjylyq qıyndyqtarǵa tap bolyp otyr. Aqpan aıynda júrgizilgen CBS News saýalnamasyna sáıkes, respondentterdiń 77%-y qazirgi kezde bala tárbıeleý aldyńǵy býyndarǵa qaraǵanda qıynyraq dep sanaıdy. 

Kóp nárse aımaqqa baılanysty ekeni atalyp ótti. Úsh shtatta – Alıaska, Kanzas jáne Montana – shyǵyndar ótken jylmen salystyrǵanda 20%-dan ósti, al Gavaıı bala tárbıeleý úshin eń qymbat shtat: LendingTree otbasylar 2026 jyly 412 661 dollar jumsaýǵa májbúr bolady dep boljaıdy. 

Alaıda, 2024 jyly amerıkalyq otbasynyń ortasha tabysy 83 730 dollardy quraǵanyn eskersek, bala týǵannan bastap mektepti bitirgenge deıin tárbıeleýdiń jalpy quny aıtarlyqtaı ósken. Zillow málimeti boıynsha, balany tárbıeleý quny qazir AQSh-taǵy ortasha turǵyn úı baǵasyna jaqyndap keledi, ol 31 qańtardaǵy jaǵdaı boıynsha 356 000 dollardy qurady. 

Buǵan deıin amerıkalyqtardyń qaryzy 18,6 trıllıon dollarǵa jetkeni habarlanǵan bolatyn.