AQSh-ta «aıý shabýyly» týraly vıdeo saqtandyrý alaıaqtyǵyn áshkereledi
ASTANA. KAZINFORM – Kalıfornııada qymbat kólikterge «aıý shabýylyn» qoldan uıymdastyryp, saqtandyrý tólemin almaq bolǵan úsh adam sottaldy, dep habarlaıdy Bild.
Oqıǵa 2024 jyldyń qańtarynda bastalǵan. Saqtandyrý kompanııasyna Rolls-Royce Ghost kóliginiń búlingeni týraly ótinish túsip, oǵan «aıýdyń» kólikti qıratyp jatqan sáti beınelengen vıdeo tirkelgen. Sol kúni Mercedes G63 AMG jáne Mercedes E350 kólikterine qatysty taǵy eki uqsas shaǵym túsken. Barlyq jaǵdaılar aıýlar kezdesetin Leık-Erroýhed aýdanynda bolǵan.
Alaıda sarapshylar alaıaqtyqty tez áshkerelegen. Kalıfornııanyń balyq jáne jabaıy tabıǵat departamentiniń bıology zaqym janýardan emes, adam áreketinen bolǵanyn anyqtaǵan. Beınejazbada aıý emes, arnaıy kostıým kıgen adam bolǵany belgili boldy.
Osydan keıin saqtandyrý tergeýshileri «Aıý tyrnaǵy» operatsııasyn bastap, kúdiktilerdiń úılerinde tintý júrgizip, aıý kostıýmin tárkiledi.
– Bastapqyda sený qıyn kóringen jaǵdaı aqyry shyndyq bolyp shyqty, al kináliler zań aldynda jaýapqa tartyldy, – dedi Kalıfornııanyń saqtandyrý komıssary Rıkardo Lara.
Tergeý barysynda aıyptalýshylar – Alfııa Z., Rýben T. jáne Vahe M. saqtandyrý alaıaqtyǵyn moıyndady. Sot sheshimimen árqaısysy 180 táýlikke bas bostandyǵynan aıyrylyp, eki jyl shartty jaza aldy.
Aıta keteıik, AQSh-taǵy atysta segiz balany óltirgen kúdikti olardyń jeteýiniń ákesi bolyp shyqty.
