AQSh-ta Avraam Lınkoln memorıalyna esimin jazǵan qyrǵyzstandyq jaýapqa tartyldy
ASTANA. QazAqparat - Vashıngtonda vandalızm boıynsha aıyptalǵan Qyrǵyzstan azamaty ustaldy. Bul týraly Kabar qyrǵyz SІM-iniń baspasóz qyzmetine silteme jasap habarlaıdy.
Qyrǵyzstandyq azamat AQSh prezıdenti Avraam Lınkolnniń memorıalyna tıynmen syryp esimin jazǵan.
Oqıǵa 2017 jyldyń 8 qyrkúıeginde boldy. Jaǵdaıdy anyqtaý maqsatynda Vashıngtondaǵy Qyrǵyzstan Respýblıkasynyń elshiligi qalanyń polıtsııa bólimshesine baılanysqa shyqty. Ondaǵylar dıplomatııalyq ókildikke N.B. esimdi azamattyń vandalızm boıynsha ustalǵandyǵyn rastady.
Qyrǵyzstan Respýblıkasynyń azamaty qazan aıyna belgilengen sot otyrysyna kelý buıryǵymen 19 qyrkúıek kúni bosatyldy. Sot bekitken keltirilgen shyǵyn kólemi 2 myń dollardy qurady.
Vashıngtondaǵy Qyrǵyzstan elshiliginiń qyzmetkeri qandaı da bir quqyqtyq kómek kórsetý maqsatynda onymen baılanysqa shyqty. N.B. áńgimelesý barysynda kinásin moıyndap, istegen isine ókinetindigin bildirdi.
