AQSh-ta áýede ushaqtyń qozǵaltqyshy jaryldy, bir adam qaza tapty
ASTANA. QazAqparat - AQSh-ta jolaýshylar ushaǵynyń bir qozǵaltqyshy áýede jarylyp ketti, apattan bir adam qaza tapty jáne jeti jolaýshy zardap shekti, dep habarlaıdy QazAqparat Bı-Bı-Sı agenttigine silteme jasap.
Southwest Airlines kompanııasynyń 1380-reısi Fıladelfııaǵa qonýǵa májbúr boldy. Oqıǵa saldarynan ushaqtyń qanatyna, fıýzelıajy jáne terezelerine zaqym kelgen.
Oqys oqıǵa jergilikti ýaqyt boıynsha seısenbi kúni tańerteń bolǵan. «Boıng» 737-700 ushaǵy Nıý-Iorktan Dallasqa reıs jasaǵan. Bortta 143 jolaýshy men ekıpajdyń bes múshesi bolǵan.
Kýágerlerdiń aıtýynsha, jarylystan keıin qysymnyń áserinen synǵan terezege bir áıel keptelip qalǵan, alaıda basqa jolaýshylar ony ishke tartyp kirgizgen.
Ushaq Fıladelfııaǵa Grınvıch boıynsha saǵat 15.20-da sátti qondy.
Qazir AQSh-tyń Azamattyq avıatsııa federaldyq agenttigi oqıǵanyń mán-jaıyn anyqtap jatyr. Kólik qaýipsizdigi boıynsha AQSh-tyń ulttyq basqarmasy (NTSB) bir adamnyń qaza tapqanyn rastady.
Fıladelfııa órt qyzmetiniń basshysy Adam Tıeldiń habarlaýynsha, jaraqat alǵan jeti jolaýshyǵa medıtsınalyq kómek kórsetilgennen keıin qaıtarylǵan.
Onyń aıtýynsha, jolaýshylar men ekıpaj «qıyn jaǵdaıda ózderin jaqsy ustaı bilgen».
Órt sóndirýshiler qozǵaltqyshtardyń birinde janarmaı aǵyp, sonyń saldarynan órt shyqqanyn anyqtady. Jerge qonǵannan keıin órt sóndirilgen.
Basty foto: @joeasaprap
Foto: @EMMS_MrJohnson, @mtranchin
