AQSh-ta aty ańyzǵa aınalǵan balýan jáne kınoakter dúnıeden ótti

ASTANA. KAZINFORM — AQSh-ta 72 jasynda aty ańyzǵa aınalǵan balýan jáne kınoakter Halk Hogan qaıtys boldy, dep habarlaıdy Euronews.

BAQ-tyń habarlaýynsha, jedel járdem ony Florıdadaǵy úıinen alyp ketken. Aýrýhanada onyń júrek toqtaýyna baılanysty kóz jumǵany rastaldy.

Sportshynyń densaýlyǵyna qatysty máseleler buryn da birneshe ret aıtylǵan bolatyn — sońǵy aılarda ol birneshe operatsııany bastan ótkergen.

Halk Hogannyń shyn aty — Terrı Djın Bollea. Ol bul laqap esimdi 1977 jyly balýandyq mansabyn bastaǵannan keıin alǵan. 1980-jyldardyń basynda-aq Hogannyń tanymaldyǵy artyp, keıbir sarapshynyń pikirinshe, ol kúresti tek aıasy tar sheńberdegi sport túrinen kópshilikke arnalǵan otbasylyq shoýǵa aınaldyrǵan.

Hogan — ári balýan, ári júrgizýshi retinde 80-jyldardaǵy shoý-bıznes juldyzdarynyń biri boldy jáne keıin de tanymaldylyǵyn joǵaltpady. Alaıda 2015 jyly onyń ruqsatynsyz jazylyp, jarııalanǵan násilshil pikirleri onyń bedeline nuqsan keltirdi.

Halk Hogan óziniń tanymaldyǵy men erekshe kelbetiniń arqasynda kıno men teledıdarda da kórindi. Ol alǵash ret 1982 jyly «Rokkı 3» fılminde debıýt jasady. Keıin «Erejesiz jekpe-jek», «Qala mańyndaǵy komando», «Bala kútýshi myrza», «Kúshti Santa-Klaýs» syndy fılmderde oınady. Sonymen qatar «Malıbý qutqarýshylary», «Qatal Ýoker» sııaqty teleserıaldarda epızodtyq rólderde boı kórsetti jáne birneshe fılm men serıaldy ózi prodıýserlik etti.

Budan buryn Black Sabbath tobynyń solısti jáne vokalıst Ozzı Osborn 76 jasynda qaıtys bolǵanyn jazǵan edik.