AQSh-ta áskerı qyzmetshilerdiń ólimine COVID-19 vaktsınasynyń yqtımal áseri tekserilip jatyr
ASTANA. KAZINFORM - AQSh Densaýlyq saqtaý mınıstriniń keńesshisi, áskerı dáriger Tereza Long 2021-2022 jyldary amerıkalyq áskerı qyzmetshiler arasynda bolǵan ólim jaǵdaılary men COVID-19 vaktsınasy arasynda baılanys bolýy múmkin ekenin zerttep jatyr, dep habarlaıdy TASS.
Politico málimetinshe, Long bul týraly AQSh prezıdenti Djo Baıdenniń ákimshiligi kezinde áskerı qyzmetshilerdi vaktsınatsııalaý máselesine jaýapty bolǵan Ortalyq barlaý basqarmasynyń joǵary laýazymdy qyzmetkerin qyzmetten bosatýǵa qatysty sot protsesi barysynda málimdegen.
Habarlanǵandaı, Long AQSh Qorǵanys mınıstri Pıt Hegset jáne Densaýlyq saqtaý mınıstri Robert Kennedı kishimen birge áskerı qyzmetshilerdi mindetti vaktsınatsııalaý talaby qoldanysta bolǵan kezeńde vaktsına saldyrý men áskerı qyzmetshiler arasyndaǵy ólim-jitim arasynda yqtımal baılanys bar-joǵyn tekserip jatyr.
Longtyń aıtýynsha, ol COVID-19 vaktsınasy salynǵannan keıin bolǵan 28 ólim jaǵdaıy týraly biledi.
Politico sondaı-aq 2024 jylǵy zertteýdiń derekterin keltiredi. Oǵan sáıkes, Pfizer jáne Moderna vaktsınalaryn alǵannan keıin birneshe júz adamnan júrek bulshyqetiniń qabynýy anyqtalǵan. Sonymen qatar Pentagonnyń 2026 jylǵy esebinde áskerı qyzmetshiler arasynda vaktsınatsııadan keıin júrek aýrýlary jaǵdaıynyń artqany aıtylǵan. Alaıda esepte ólim jaǵdaılary kórsetilmegen.
Budan bólek, Long AQSh Densaýlyq saqtaý jáne halyqqa qyzmet kórsetý mınıstrliginiń vaktsınalardyń janama áserleri týraly esep berý júıesinde tirkelgen, rastalmaǵan 2 544 áskerı qyzmetshiniń ólim jaǵdaıyn teksermek. Onyń maqsaty bul ólimderdiń COVID-19 vaktsınatsııasymen baılanysty bolýy múmkin be ekenin anyqtaý.
Onyń aıtýynsha, zertteý shamamen bir jylǵa sozylýy múmkin.
Osyǵan deıin Moderna ázirlegen vaktsına keıbir qaterli isikterdi emdeý tásilin ózgertýi múmkin ekeni týraly jazdyq.
