AQSh-ta «aryzqoı» áýejaıdyń ústinen 6,5 myń aryz túsirgen
ASTANA. QazAqparat - Byltyr Amerıka astanasynyń turǵyny qaladan 5 shaqyrym jerdegi Ronald Reıgan atyndaǵy áýejaıdyń shýylyna qatysty 6,5 myń ret shaǵymdanǵan. Osynshama kóp shaǵym berý úshin jyl boıy táýligine 18 márte qońyraý shalý kerek, dep jazady álemdik BAQ.
The Washington Times gazetiniń jazýyna qaraǵanda, 2015 jyly Vashıngtonnyń áýe toraptary basqarmasyna ushaqtardyń shýyna qatysty 8 670 aryz-shaǵym kelip tússe, sonyń 6 500-i bir adamǵa ǵana tıesili.
Áýejaıdyń ókilderi aryzqoı azamattyń aty-jónin jarııalamaı otyr. Ol qalanyń soltústik-batysynda turatyndyǵy ǵana belgili boldy. Áýejaıdyń resmı ókilderi bir adam ǵana shaǵymdansa da ony qaraýǵa mindetti ekendikterin jasyrmaıdy.
Olar basqa da turǵyndardyń NextGen navıgatsııalyq qurylǵysy jańartylǵannan keıin ý-shýdyń kóbeıip ketkenine shaǵym túsire bastaǵanyn moıyndap otyr. Mıllıard dollar jumsalǵan júıe radarlardyń ornyna jer serikter kómegimen navıgatsııany qamtamasyz etedi.
Sonyń arqasynda ushaqtar janar maı men atmosferaǵa shyǵatyn qaldyqtardy azaıtyp, barynsha týra baǵdarlardy tańdaıdy. Osynyń saldarynan áýejaıǵa jaqyn qalanyń keı tustarynda shý qalyptan tys kóbeıip ketken.
