AQSh-ta aptap ystyqtan 25 adam kóz jumdy
ASTANA. KAZINFORM — AQSh-tyń birqatar óńirinde tirkelgen rekordtyq aptap ystyqqa baılanysty 25 adam qaıtys boldy. Bul týraly NBC News telearnasyna silteme jasap, Report agenttigi habarlady.
Málimetke sáıkes, qaza bolǵandardyń eń kóbi Nıý-Djersı shtatynda tirkelgen. Munda 22 adam aptap ystyqtyń qurbany boldy.
Nıý-Djersı shtatynyń Densaýlyq saqtaý departamentiniń ókili Dalııa Evaıstiń aıtýynsha, kóz jumǵandardyń basym bóligi – jasy 30 ben 80 aralyǵyndaǵy azamattar. Ólim jaǵdaılary shtattyń 10 okrýginde, negizinen ortalyq jáne soltústik bóliginde tirkelgen.
Sondaı-aq Illınoıs shtatynda bir adam, Mıssısıpı shtatynda eki adam qaıtys bolǵan. Qaza tapqandardyń kóbi kondıtsıoneri joq úılerden tabylsa, keıbiri kóshede nemese turaqta turǵan kólikterdiń ishinde kóz jumǵan.
Aptap ystyq 4 shildede Vashıngtonda ótken AQSh-tyń Táýelsizdik kúnine arnalǵan merekelik is-sharalarǵa da áser etti. Ulttyq alleıadaǵy merekelik shara kezinde birneshe adamǵa medıtsınalyq kómek kórsetildi. Jylý soqqysyn alǵandardyń naqty sany ázirge naqtylanyp jatyr.
Buǵan deıin Frantsııa, Belgııa jáne Nıderlandyda aptap ystyqtan 3,7 myń adam qaıtys bolǵanyn jazdyq.
