AQSh-ta alǵash ret jatyrdaǵy balanyń julyn jaryǵyn emdeıtin jańa ádis tabyldy
ASTANA. KAZINFORM — AQSh-ta alǵash ret júrgizilgen klınıkalyq zertteý kórsetkendeı, platsentadan alynǵan baǵanaly jasýshalardy júktilik kezinde uryqtyń julyn aımaǵyna qoldaný julyn jaryǵynyń (spina bifida) aýyr túrimen týatyn balalardyń jaǵdaıyn jaqsartýy múmkin.
Zertteýdi AQSh-taǵy Kalıfornııa ýnıversıtetiniń (Deıvıs) fetaldyq jáne neonataldyq hırýrgııa mamany Dıana Farmer basqardy. Zertteýge alty júkti áıel qatysty. Olardyń ishindegi balalaryna mıelomenıngotsele dıagnozy qoıylǵan. Bul – julyn jaryǵynyń eń aýyr túri, ol sal bolyp qalýǵa, mı zaqymdanýyna ákelýi múmkin.
Operatsııalar júktiliktiń 24–25 aptasynda jasalǵan. Dárigerler donorlyq platsentalardan alynǵan baǵanaly jasýshalardy uryqtyń ashyq qalǵan julyn bóligine tikeleı jiberdi. Operatsııalar kezinde eshqandaı asqynýlar tirkelmegen. Balalar shamamen 34-aptada dúnıege kelgen. Sábılerde ınfektsııa, julyn suıyqtyǵynyń aǵýy nemese isik paıda bolý belgileri baıqalmaǵan.
Sonymen qatar, barlyq jańa týǵan nárestede qaýipti asqynýlardyń biri – mıdyń artqy bóliginiń moıyn aımaǵyna yǵyspaǵany anyqtaldy. Bul ádette julyn suıyqtyǵynyń aınalymyn buzady.
Degenmen Melbýrndegi Koroldik áıelder aýrýhanasynyń fetaldyq medıtsına mamany Kler Ýaıthed jańa emdeý ádisterin zerttegende saqtyq qajet ekenin atap ótti.
Qazirgi ýaqytta da uryqta omyrtqa aqaýyn jabý boıynsha operatsııa jasalady. Biraq Farmerdiń aıtýynsha, mundaı operatsııadan keıin de balalardyń shamamen 60%-y ózdiginen júre almaıdy. Buǵan deıin qoılarda júrgizilgen tájirıbeler hırýrgııa men baǵanaly jasýshalardy birge qoldaný janýarlardyń turyp, júre alýyna múmkindik bergenin kórsetken.
Ǵalymdar bul ádistiń tolyq tıimdiligi týraly aıtýǵa áli erte ekenin aıtady. Onyń qaýipsizdigi men uzaq merzimdi nátıjelerin dáleldeý qajet. Qazirdiń ózinde taǵy 29 júkti áıel qatysatyn keńeıtilgen zertteý maquldanǵan.
Maqalanyń aǵylshyn tilindegi túpnusqasyn myna jerden oqı alasyz.
Buǵan deıin Ulybrıtanııa men Brazılııanyń densaýlyq saqtaý organdary salmaq túsirýge arnalǵan GLP-1 retseptor agonısteri tobyna jatatyn dárilerdi (Ozempic, Wegovy, Saxenda) qabyldaıtyn adamdarda jedel pankreatıt damý qaýpi bar ekenin eskertken.
