AQSh-ta álemdegi eń uzyn balmuzdaq daıyndaldy
ASTANA. QazAqparat - AQSh-tyń Mıchıgan shtatyndaǵy Neshvıll kentinde Moo-ville Creamery kompanııasy eń uzyn sandeı (balmuzdaq deserti) daıyndap, Gınnestiń rekordtar kitabyna endi.
Bul týraly Associated Press habarlady.
Rekordtyq desert 1110 metrge sozylady. Oǵan 3200 lıtrden astam balmuzdaq, shamamen 360 lıtr shokoladty sırop, 172 quty shaıqalǵan kilegeı jáne 7200 shıe qoldanyldy, dep jazdy Muskegon Chronicle. Taǵamdy 250-ge jýyq erikti bir jarym kún boıy daıyndady.
Bir qyzyǵy, úsh aı buryn Mıchıgan shtatynyń Lýdıngton qalasynda eń uzyn balmuzdaq daıyndalǵan edi. Onda House of Flavors kompanııasy 910 metrlik sandeı ázirlegen bolatyn. Gınnestiń rekordtar kitabynyń jyl saıynǵy basylymy shyqqansha Moo-ville Creamery kompanııasy qarsylastarynan ozyp úlgerdi. Sondyqtan, olardyń jetistigi ǵana resmı túrde moıyndalady.
Foto: Tina Westendorp
