AQSh-ta álemdegi eń qymbat teńiz saıahaty uıymdastyrylmaq
ASTANA. 20 qańtar. QazAqparat - Álemde eń qymbat bolyp sanalatyn jer sharyn aınalatyn jańa teńiz saıahaty kelesi jyly bastalady.
346,5 myń dollar tólep, álemniń 30 eliniń 50 portyna barýy kózdelgen 115 kúndik saparǵa shyǵýǵa bolady.
Saıahat Los-Andjeles qalasynan bastaý alady, sońǵy núktesi - Fort-Laýderdeıl bolmaq, dep jazady Travel.
Saıahatshylar kemesiniń jasaqtalýy tańdaı qaqtyrady. Sý kóliginiń edeni mármár tastarmen kómkerilgen, ishine jumsaq bylǵary dıvandar qoıylǵan. Ár kaıýtada eki jatyn bólme, eki jýynatyn bólme, túrli sýsyndarǵa toly bar qarastyrylǵan.
Saıahattyń qunyna sondaı-aq keme bortynda úsh kontsertti tamashalaý, saltanatty gala-keshki as, Namıbııa shólindegi keshki as, porttardaǵy sándi qonaq úılerge ornalasý, san alýan syılyqtar, transferler, Wi-Fi arqyly ınternet jelisine qosylý jáne t.s.s. kiredi.
Jer sharyn aınalýǵa baǵyt alǵandar - Taıtı, Avstralııa, Gonkong, Balı, Vetnam, Taıland, Malaızııa, Maldıv, Zanzıbar, Madagaskar elderin, Ońtústik Afrıka Respýblıkasyn jáne Karıb teńiziniń kóptegen araldaryn tamashalaıdy. Teńiz saıahatshylary 2015 jyldyń 1 mamyrynda saparǵa attanady.
