AQSh-ta alaıaqtyq úshin aıyptalǵan qazaqstandyq azamat qolhat arqyly bosatyldy
ASTANA. 12 naýryz. QazAqparat - AQSh-ta astyrtyn áreketterdi júzege asyryp, alaıaqtyq jasamaq boldy degen aıyp taǵylǵan Qazaqstan azamaty Alekseı Lı turǵylyqty jerinen eshqaıda ketpeý týraly qolhat berý arqyly bosatyldy.
Bul týraly búgin Syrtqy ister mınıstrliginde ótken baspasóz máslıhatynda vedomstvonyń resmı ókili Altaı Ábıbýllaev málim etti.
«Advokattyń aqparaty boıynsha Alekseı Lı óz kinásin tolyq moıyndaǵan. Onyń tarapynan AQSh aýmaǵynan eshqaıda shyǵyp ketpeý týraly kelisim alynǵan soń, ol bosatyldy», - dedi A. Ábıbýllaev. Resmı ókildiń aıtýynsha, atalǵan máselege qatysty aǵymdaǵy jyldyń mamyr aıynda sot otyrysy ótetin bolady jáne sońǵy sheshimniń sol otyrysta qabyldanatyny kútilýde.
«Toqtala ketetin taǵy bir jaıt, advokat birqatar BAQ-ta jarııalanǵan «Alekseı Lı 250 myń dollar mólsherinde aıyppul tóledi jáne on jylǵa sottaldy-mys» degen aqparatty joqqa shyǵardy», - deıdi A.Ábıbýllaev.
