AQSh-ta alapat sý tasqynynan 7 adam qaza tapty
ASTANA. KAZINFORM – AQSh-tyń Indıana shtatynda birneshe kúnge sozylǵan nóser jaýyn men rekordtyq sý tasqyny saldarynan keminde 7 adam qaza tapty, dep habarlaıdy ABC News.
ABC News málimetinshe, qaza tapqandar arasynda 4 jastaǵy bala da bar. Nóser jaýyn saldarynan ózender arnasynan asyp, birqatar eldi mekendi sý basty.
Indıanapolıste tótenshe jaǵdaılar qyzmeti demalys kúnderi sýda qalǵan adamdardy qutqarý úshin 56 ret operatsııa júrgizgen. Júzdegen turǵyn úı men basqa da ǵımarat sý astynda qaldy.
Keıbir aýdandarda jaýyn-shashyn mólsheri 11 dıýımnen, ıaǵnı shamamen 280 mıllımetrden asty. Ýaıt-Rıver ózenindegi sý deńgeıi jekelegen ýchaskelerde buryn-sońdy bolmaǵan kórsetkishke jetti.
Dúleı daýyl men sý tasqyny energetıkalyq ınfraqurylymǵa da áser etti. Apattyń sharyqtaý kezeńinde shtatta shamamen 130 myń tutynýshy elektr energııasynsyz qalǵan.
Qazir keıbir aýdandarda sý deńgeıi tómendeı bastaǵanymen, bılik turǵyndardy saq bolýǵa shaqyryp otyr. Sý basqan joldar men búlingen ınfraqurylym áli de qaýip tóndiredi.
AQSh prezıdenti Donald Tramp Indıanaǵa federaldyq tótenshe kómek kórsetý týraly deklaratsııany maquldady. Bul zardap shekken aýdandarǵa qalpyna keltirý jumystary úshin federaldyq resýrstar tartýǵa múmkindik beredi.
Jergilikti bılik pen tótenshe jaǵdaılar qyzmetteri zardap shekken aýdandarda shyǵyn kólemin baǵalap, qalpyna keltirý jumystaryn jalǵastyryp jatyr.
Aıta keteıik, buǵan deıin «Lala» daýyly Gavaııge jetkenin jáne sonyń saldarynan bir adam qaza taýyp, ondaǵan myń úı jaryqsyz qalǵanyn jazdyq.
