AQSh-ta ákesimen 20 dollarǵa bástesken bala buqaǵa minip aldy
ASTANA. QazAqparat -Djordjııa turǵyny kishkentaı ulyna buqaǵa qarǵyp minseń, 20 dollar berem dep ýáde etken, dep jazdy Daily Mirror.
YouTube jelisinde jarııalanǵan beınerolıkti otaǵasy túsirgen, onda 4-5 jas shamasyndaǵy búldirshinniń buqaǵa jaqyndap, minýge tyrysqanyn kórýge bolady. Vıdeo avtory ulyna aqshalaı marapat ýáde etkenin túsindirdi.
Rolıkte uldyń ápkesiniń qoryqqan daýysy estilip tur, anasy da uly úshin qatty ýaıymdap tur. Biraq, olardyń eshqaısysy júrek jutqan jas batyrdy toqtatqan joq.
Kishkentaı ul buqaǵa mingen kezde, janýar týlaı bastady. Ata-anasy da túsirilimdi toqtatyp, kómekke umtylǵan.
Uldyń ákesi Facebook-taǵy jazbasynda ulynyń aman-esen ekenin jáne ýáde etilgen 20 dollardy alǵanyn habarlady.
«Men onyń shyn máninde buqaǵa jaqyndaıtynyn bilmedim, jaqyndasa da onyń arqasyna mine alady dep kútken joqpyn», - dep jazdy ol.
