AQSh -ta 76 adam aptap ystyqtyń qurbany boldy

NЬıÝ-IORK. QazAqparat – AQSh-tyń Oregon jáne Vashıngton shtattarynda 76 adam qalyptan tys ystyqtyń qurbany boldy, al deneniń qyzyp ketýine baılanysty aýrýhanaǵa jatqyzylǵandardyń sany júzdep sanalady, dep habarlaıdy QazAqparat The Wall Street Journal gazetine silteme jasap.

Basylymnyń málimetinshe, tek Oregon shtatynda deneniń qyzyp ketý saldarynan 63 adam qaıtys boldy.

«Bul naǵyz densaýlyq daǵdarysyna aınaldy. Qalyptan tys ystyqtyń ólimge aparyp soǵatynyn kórsetti», – deıdi Maltnoma okrýginiń (Oregon) Densaýlyq saqtaý departamentiniń ókili doktor Djennıfer Vaıns. «Bizdiń jaqta jaz budan da qatty ysıdy, sondyqtan bul jaǵdaı áli de qaıtalanady dep oılaımyn».

Portlendta jáne shtattyń basqa da qalalarynda osy aptada temperatýra 46 gradýsqa deıin kóterildi. Kórshiles Vashıngton shtatynda sál salqyndaý boldy, onda ystyq saldarynan bolǵan 13 ólim rastaldy. Kóz jumǵandar 44-ten 97 jasqa aralyǵynda. Olardyń óliminiń sebebi gıpertermııa –deneniń ystyqty jeńe almaıtyndaı qyzyp ketýi.

Vashıngtonnyń medıtsına basqarmasy aptap saldarynan ózin nashar sezingen 1 648 adamǵa shuǵyl barǵandary týraly habarlady. 358 jaǵdaıda adamdar statsıonarlyq emdelýge jiberildi.

AQSh Ulttyq meteorologııalyq qyzmetiniń boljamyna sáıkes, eldiń batys jaǵalaýyndaǵy qalyptan tys ystyq taǵy birneshe kúnge sozylady.