AQSh-ta 6 jasar bala mektep dırektoryna qol kótergeni úshin qamaýǵa alyndy
ASTANA. 27 sáýir. QazAqparat - Amerıkanyń Indıana shtatynda mektep dırektorynyń kabınetinde shý kótergen 6 jasar bala qamaýǵa alyndy. Bul týraly BNews.kz jazdy.
Reuters agenttiginiń habarlaǵanyndaı, bala 18 sáýirde mektep dırektorynyń kabınetinde shý kótergennen keıin qamaýǵa alynǵan eken. Kishkentaı buzaqy jerge aýnap, aıqaılap, jylaǵan, sondaı-aq ony tynyshtandyrmaq bolǵan mektep dırektory men onyń orynbasaryn urǵylap, óltirem dep qorqytqan. Kishkentaı balaǵa álderi kelmegennen keıin ustazdar polıtsııa shaqyrtýǵa májbúr bolypty.
Leıtenant Maıkl Ternerdiń (Michael Turner) aıtýynsha, mundaı jaǵdaı alǵash ret oryn alyp otyrǵan joq. Tártip saqshylary jumys barysynda kishkentaı buzaqylarmen jıi kezdesetin kórinedi.
AQSh-ta alty jasar bala qamaýǵa alyndy degen aqparat jańalyq bolýdan qalǵaly qashan. Budan sál erterek BAQ Djordjııada polıtseıler alty jasar qyz balany ýchaskege qolyna kisen salyp jetkizgenderin habarlady. Qarshadaı qyz balabaqshanyń astan-kesteńin shyǵarǵan eken. Sol kezde qoǵam balanyń qolyna kisen salynǵanyna narazylyq bildirgen bolatyn. Alaıda tártip saqshylary árbir tártip buzǵan adam jasyna qaramastan ýchaskege kisen salynyp jetkizilýi kerek ekenin alǵa tartty.
