AQSh-ta 51-shtat qurý máselesi talqylanyp jatyr
ASTANA. KAZINFORM — Illınoıs shtatynyń birqatar okrýgi Chıkagodan bólek jańa shtat qurý máselesine qyzyǵýshylyq tanytty, dep habarlaıdy Kazinform agenttiginiń menshikti tilshisi Daily Mail basylymyna silteme jasap.
Illınoıs shtatyndaǵy 102 okrýgtiń 33-i Chıkago ornalasqan Kýk okrýginen bóliný máselesi boıynsha mindetti kúshi joq referendým ótkizdi. Taǵy 11 okrýg bul máseleni aldaǵy aralyq saılaýda daýysqa salmaq.
Illinois Separation naýqanynyń málimetinshe, referendým ótkizgen 33 okrýgtiń barlyǵy Kýk okrýgin qospaı, AQSh-taǵy 51-shtatty qurýdy qoldap daýys bergen.
Bólinýdi jaqtaýshylar shtat bıligi aýyldyq aımaqtardyń máselelerine jetkilikti kóńil bólmeıdi dep sanaıdy. Olar Chıkagonyń Illınoıs saıasatyna yqpalyn, demokrattardyń bıligin jáne qylmys deńgeıiniń joǵarylyǵyn synǵa alady. Illinois Separation uıymynyń jetekshisi Loret Nıýlınniń aıtýynsha, turǵyndar óz múddesi eskerýsiz qalyp otyr dep esepteıdi.
Okrýgterdiń basym bóligi respýblıkashyldardy qoldaǵanymen, shtat halqynyń kóbi demokrattar basym qalalarda turady. Kýk okrýginde halyqtyń 41 paıyzy, al kórshiles tórt iri okrýgte taǵy 22 paıyzy shoǵyrlanǵan. Demokrat gýbernator Djeı Prıttsker bul bastamany saıası aıla dep atap, shtattyń bólinbeıtinin málimdedi.
Jańa shtat qurý úshin aldymen Illınoıs zań shyǵarýshy organynyń, keıin AQSh Kongresiniń maquldaýy qajet. Shtattyń zań shyǵarýshy organynyń eki palatasynda da demokrattar basym bolǵandyqtan, bul bastamanyń júzege asýy ekitalaı. Degenmen ony qoldaýshylar Batys Vırdjınııa men Men shtattarynyń qurylý tarıhyn mysalǵa keltirip, mundaı qadamnyń múmkin ekenin alǵa tartady.
1960-1970 jyldary Illınoıs shtatynan bóliný áreketteri jasalyp, 16 okrýg «Forgottonııa respýblıkasyn» qurýdy qoldady. Bastama júzege aspasa da, ınfraqurylym men qarjy tapshylyǵyna nazar aýdaryp, joldardy jóndeýge, kópirler salýǵa jáne temirjol qatynasyn qalpyna keltirýge yqpal etti.
Buǵan deıin Tramp Kanadanyń AQSh quramyna qosylatynyna senimdi ekenin málimdegenin habarlaǵan edik.
