AQSh-ta 4 bala mas ana júrgizip kele jatqan kólikten sekire qashqan
ASTANA. QazAqparat - AQSh-ta 4 bala (11 jastaǵy eki qyz bala men eki ul) solardyń biriniń anasy mas kúıinde basqaryp kele jatqan kólikten sekirip túsken.
Daily Mail habarlaǵandaı, kólik baǵanaǵa soǵylyp, shynysy shaǵylǵan soń olar osyndaı áreketke barǵan. Balalar japa shekpegen.
Oqıǵa Florıda shtatynyń Geınsvıll eldi mekeninde oryn alǵan. Balalar demalys kúnderinde dostarynyń anasynyń qaraýynda bolǵan. Keıin áıel ózin jaǵymsyz jaǵynan kórsete bastaǵan. Kólikten sekirgen balalar qoǵamdyq tamaqtaný ornyna baryp, sol jerde meıramhanaǵa kelýshilerdiń biri polıtsııa shaqyrtypty.
Tintý barysynda quqyq qorǵaý organdarynyń qyzmetkerleri júrgizýshiniń otyratyn ornynyń astyńǵy jaǵynda marıhýana men ony shegýge arnalǵan jabdyqty tapqan.
Polıtsııa aqparatynsha, ustalǵan 45 jastaǵy Andjela Výdvort oqıǵa oryn almas buryn eki saptyaıaq syra jáne ózge alkogoldi ishimdik ishken. Áıelge birneshe bólim (esirtki saqtaý, az kólemde marıhýana saqtaý, balalarǵa qatysty mindetti oryndamaýdyń tórt faktisi) boıynsha aıyp taǵyldy. Onyń balasy týystaryna tapsyryldy, qalǵan úsheýi úılerine jetkizildi.
