AQSh-ta 35 jyl ishindegi munaı salasy qyzmetkerleriniń eń iri ereýili bastaldy
ASTANA. QazAqparat - Jeksenbi kúni AQSh-ta 1980 jyldan bergi munaı salasy qyzmetkerleriniń eń iri ereýili bastaldy. Oǵan toǵyz iri munaı óńdeý zaýytynyń 3,8 myń qyzmetkeri qatysýda.
Kóteriliske shyqqandar jalaqy kóleminiń kóterilýin talap etýde. Sharany bastaý sheshimin Amerıkanyń metallýrgııalyq óndiris qyzmetkerleriniń birikken kásibı odaǵy qabyldady. Ol 230-dan astam amerıkalyq munaı óńdeý zaýyty men hımııalyq kásiporyndar jumysshylarynyń múddesin qorǵaıdy, dep jazdy TASS.
Úsh jyldyq ujymdyq kelisimsharttyń merzimi ótken jeksenbide aıaqtalǵan. Senbi kúni kásipodaq usynylǵan kelisimsharttyń besinshi nusqasynan bas tartty.
"Munaı kompanııalary óte sarań, olar tabystaryn adamdardyń densaýlyǵy men qaýipsizdiginen joǵary baǵalaıdy", - dedi kásipodaqtyń vıtse-prezıdenti Tom Konýeı. Ereýilshiler eńbekaqyny kóterý, jumystan tys saǵatty shekteý, jáne sýbmerdigerler tarapynan básekelestikten qorǵaý talaptaryn qoıýda.
Ereýil bastalǵan munaı óńdeý zaýyttary Kalıfornııa, Tehas, Kentýkkı jáne Vashıngton shtattarynda ornalasqan. Olar LyondellBasell, Marathon Oil, Shell jáne Tesoro kompanııalarynyń ıeliginde. Olar AQSh-tyń 10% munaıyn qaıta óńdeıdi. Birqatar kásiporynda óndiris kólemi báseńdedi.
BAQ atap ótkendeı, jýyq arada jańa eńbek kelisimsharty jasalmasa, kásipodaqtyń qaramaǵyndaǵy barlyq 63 munaı óńdeý zaýyty qosylýy múmkin. Olar eldegi munaıdyń 64%-yn óńdeıdi eken.
Sarapshylardyń aıtýlaryna qaraǵanda, AQSh-taǵy munaı salasy qyzmetkerleriniń ereýili álemdik naryqtaǵy munaı baǵasynyń tómendeýine ákelýi múmkin.
