AQSh-ta 35 jyl buryn urlanǵan Stradıvarıdyń skrıpkasy tabyldy
ASTANA. QazAqparat - AQSh-ta 35 jyl buryn belgili polıak-amerıkan mýzykanty jáne oqytýshy Roman Totenbergten urlanǵan Stradıvarıdyń skrıpkasy tabyldy. Mýzykalyq aspap búgin skrıpkashynyń qyzdaryna qaıtarylady, dep habarlady TASS Associated Press agenttigine silteme jasap.
1734 jyly ataqty ıtalıandyq sheber Antonıo Stradıvarı jasaǵan skrıpka Totenbergtiń kabınetinen 1980 jyly amerıkandyq Kembrıdj qalasyndaǵy mýzyka mektebinde ol bergen kontsertten keıin joǵalyp ketken bolatyn. Oqytýshy aspaptyń joǵalýyna skrıpkanyń qasynda aınalshyqtap júrgen jas mýzykant Fılıp Djonsonnan kúdiktengen, biraq ta naqty dáleli bolmaǵan.
Djonson 2011 jyly qaıtys boldy, skrıpkany arnaıy qabyna salyp kilttep, burynǵy áıeline berip ketken. Ol birneshe jyl boıy onyń kilt kodyn bile almaı, bıyl ǵana ashyp, ony baǵalaýshyǵa alyp barǵan. Al baǵalaýshy ony tanyp, sol boıda FBQ-nyń urlanǵan óner shyǵarmalaryn izdeýmen aınalysatyn bólimine habarlaǵan.
Boston ýnıversıtetiniń professory Roman Totenberg 2012 jyly 101 jasynda qaıtys boldy. Onyń úsh qyzynyń biri Nına Totenberg ákesiniń urlanǵan skrıpkany kóp sóz etpegenin aıtady, óıtkeni mýzykant úshin ol otbasynyń bir múshesinen aıyrylýmen birdeı edi.
Associated Press aqparatyna qaraǵanda Totenbergtiń qyzdary Stradıvarıdyń skrıpkasyn satýǵa shyǵarmaq, biraq ta bul aspaptyń onda oınaı alatyn adamnyń qolyna túskenin qalaıdy.
