AQSh-ta 20 jastaǵy jigit dúkendegi adamdarǵa oq jaýdyrdy

ASTANA. QazAqparat - AQSh-tyń Florıda shtatynyń Djeksonvıll qalasynda kem degende úsh adam násilshil adam qolynan qaza tapty. Shabýyldaýshy ózin ózi óltirdi, dep habarlaıdy QazAqparat VVS-ge silteme jasap.

Jergilikti polıtsııanyń málimetinshe, qarýly aqtándi adam (onyń jeke basy áli ashylmaǵan, biraq ol shamamen 20 jasta ekeni belgili) Dollar General dúkenine kirip, adamdarǵa oq jaýdyrdy. Ol oq ótkizbeıtin keýdeshe kıip, tapanshamen jáne jartylaı avtomatty myltyqpen qarýlanǵan.

Shabýyldaýshy qara násildi eki er adam men áıeldi atyp óltirip, oqıǵa ornyna polıtsııa kelgennen keıin ózine qol saldy.

Djeksonvıll meri Donna Dıgan bul násilshildik negizinde jasalǵan «jekkórýshilikke toly qylmys» dep málimdedi.

Shabýylshy jalǵyz áreket etti jáne ózin óltirýdi bastapqyda-aq josparlady dep boljanýda.

Jergilikti sherıf T.Ýoterstiń aıtýynsha, qylmysker Djeksonvılldegi Kleı okrýginde ata-anasymen birge turǵan.

Aldyn ala málimet boıynsha, ol birneshe manıfest, sonyń ishinde ata-anasyna, polıtsııaǵa jáne buqaralyq aqparat quraldaryna úndeýhat jazǵan.

FTB atys faktisi boıynsha tergeý amaldaryn bastady, ol ony jekkórýshilikten jasalǵan qylmys dep sanaıdy.

Shabýyl senbi kúni AQSh-ta Vashıngtonǵa sherýdiń 60 jyldyq mereıtoıyna jáne kishi Martın Lıýter Kıngtiń «Meniń armanym bar» atty áıgili sózine oraı eske alý sharalary kezinde boldy.