AQSh-ta 2 myńnan astam geımer áýe dıspetcheri qyzmetine qabyldandy
ASTANA. KAZINFORM - AQSh Federaldyq avıatsııa basqarmasy (FAA) bıyl áýe dıspetcherlerin jumysqa qabyldaý naýqany aıasynda 2 myńnan astam mamandy qyzmetke aldy. Vedomstvo kadr tartý úshin kompıýterlik oıyn áýesqoılaryna arnaıy nazar aýdardy, dep habarlaıdy Kazinform agenttiginiń Vashıngtondaǵy menshikti tilshisi New York Post basylymyna silteme jasap.
FAA geımerlerdi jumysqa tartqannan keıin áýe dıspetcherlerin qabyldaý josparynyń basym bóligin oryndady.
AQSh kólik mınıstri Shon Daffı vedomstvo geımerler arasynan maman tartý josparynyń 94 paıyzyn oryndaǵanyn málimdedi.
-Biz avıatsııa tarıhyndaǵy eń myqty ári bilikti kadrlar quramyn qalyptastyryp jatyrmyz, – dep jazdy Shon Daffı jańa memlekettik qyzmetkerler tobyna arnalǵan Facebook-tegi jazbasynda.
FAA málimetinshe, belsendi geımerler kóp mindetti qatar oryndaý, keńistikti baǵdarlaý jáne máselelerdi sheshý sııaqty joǵary kognıtıvtik qabiletterin kórsete alady.
Vedomstvonyń paıymdaýynsha, kompıýterlik oıyndar kezinde qalyptasatyn daǵdylar áýe qozǵalysynyń qaýipsizdigin qamtamasyz etýge kómektesýi múmkin.
2006 jyly júrgizilgen zertteý geımerlerdiń birneshe nysandy bir ýaqytta baqylaý qabileti joǵary ekenin kórsetken.
2024 jylǵy zertteý bul tujyrymdy rastady. Sonymen qatar geımerlerdiń nazardy basqarý qabileti jaqsy damyǵany anyqtaldy.
-Geımerlerdiń shamamen 25 paıyzynda ǵana dástúrli joǵary bilim bar. Sondyqtan bul bastama balama kásibı joldy tańdaǵan talantty jastardy tartýǵa baǵyttalǵan, – dep jazdy AQSh Federaldyq avıatsııa basqarmasy geımerlerdi jumysqa tartý naýqany týraly.
Osyǵan deıin elimizdiń avıatsııa salasyna qandaı reformalar qajet ekeni týraly jazdyq.
