AQSh-ta 14 jastaǵy jasóspirim shtat gýbernatory saılaýyna úmitker atandy
ASTANA. KAZINFORM — Amerıkanyń Vermont shtatynda 14 jastaǵy mektep oqýshysy tarıhta alǵash ret gýbernator saılaýyna qatysady. Onyń esimi jalpy halyqtyq daýys berý bıýlletenine engizilgen, dep habarlaıdy Associated Press.
Úmitker bolyp Dın Roı tańdaldy — ol Stoý qalasynyń joǵary synyp oqýshysy. Saıası qyzyǵýshylyǵy 8 synyptan bastalǵan, keıin shtattyń zań shyǵarý májilisinde kómekshi bolyp jumys istegen. Saılaýǵa qatysý úshin ol óz partııasyn — Freedom and Unity qurdy.
Ózi jeńiske úmit artpaıtynyn moıyndaıdy, biraq jastardy saıasatqa tartý jáne el basqarýǵa qatysýǵa yntalandyrýdy maqsat etedi.
Onyń kandıdatýrasy shtat zańnamasynyń erekshelikterimen baılanysty: Vermont konstıtýtsııasynda gýbernator bolý úshin mınımaldy jas shegi kórsetilmegen, tek shtata keminde tórt jyl turý talap etiledi. AQSh-tyń basqa kóp shtattarynda jas shegi shamamen 30 jasqa teń.
Buǵan deıin taǵy bir jasóspirim — Itan Sonneborn gýbernatorlyq saılaýǵa qatysýǵa talpynys jasaǵanymen, praımerızden óte almady. Roı tarıhta alǵash ret tikeleı jalpy halyqtyq saılaýǵa qatysatyn kámeletke tolmaǵan úmitker boldy.
Sarapshylar onyń jeńý múmkindigin skeptıkalyq baǵalaıdy. Pıter Tıchoýt atap ótkendeı, formaldy túrde tipti bala da kandıdat bola alady, biraq saılaýshylar ony qoldaı qoıýy ekitalaı.
Qazirgi gýbernator Fıl Skott jasóspirimniń saıasatqa qyzyǵýshylyǵyn qoldaıtynyn aıtty. Biraq shtatty basqarýǵa tájirıbesi baryna kúmándandy.
Roıdyń ózi jas mólsheri kedergi bolmaýy kerek dep sanaıdy jáne basty maqsaty — jastardyń saıası protsesterge áser ete alatynyn kórsetý.
Byltyr Kalıfornııa gýbernatory AQSh prezıdenttigine kandıdat bolýǵa nıetti ekenin jazǵan bolatynbyz.
