AQSh-ta 14 adam elektrondy temekiniń qurbany boldy
ATLANTA. QazAqparat – Amerıkanyń Nebraska shtatynyń densaýlyq saqtaý salasynyń ókilderi elektrondy temekiden qaıtys bolǵan alǵashqy adam týraly málimdedi. Al búkil elde veıpıng qurbandarynyń sany 14-ke jetti, dep habarlaıdy «QazAqparat» HAA CNN-ge silteme jasap.
Nebraska shtaty Densaýlyq saqtaý jáne áleýmettik qyzmet mınıstrliginiń málimdeýinshe, Dýglas okrýginde turatyn 65 jastaǵy er adam bıyl mamyrda qaıtys bolǵan. Al jazda elektrondy temeki tartýdan indet taraǵany týraly resmı jarııalandy.
Veıpıng Kalıfornııa shtatynyń eki turǵynyn jalmaǵan, sondaı-aq Kanzasta eki adam, Oregonda taǵy eki adam veıpıng qurbany bolǵan. Budan bólek, Illınoıs, Indıana, Mınnesota, Mıssýrı, Florıda, Mıssısıpı jáne Djordjııa shtattarynyń bir-bir turǵyny elektrondy temekiden zardap shekken.
AQSh-tyń aýrýlarǵa qarsy kúres ortalyqtary 46 shtatta jáne Vırgınııa araldarynda 805 adamnyń ókpesi elektrondy temekiden zaqymdanǵanyn málimdedi.
Ulttyq sıpat alǵan indettiń naqty sebebi áli anyqtalǵan joq.
Dárigerlerdiń boljaýynsha, oǵan veıp quramyndaǵy tetragıdrokannabınol, marıhýanadaǵy esirtki zattar sebep bolýy múmkin.
