AQSh-ta 136 jolaýshysy bar ushaq apatty jaǵdaıda ózenge qondy
NUR-SULTAN. QazAqparat - Bortynda 136 jolaýshysy bar kommertsııalyq Boeing 737 ushaǵy Sent-Djons ózenine apatty jaǵdaıda qondy, - dep habarlaıdy «QazAqparat» Reuters agenttigine silteme jasap.
Jergilikti BAQ málimetteri boıynsha, borttaǵy eki adam jaraqat aldy, degenmen qaza tapqandar joq. Boeing 737 áýe kemesi Gýantanamo Áskerı-teńiz bazasynan ushyp kelgen. Ushaq qatty naızaǵaı kezinde qonýǵa baǵyt alyp, qoný jolaǵynan asyp ketip, ózenge qulaǵan. Djeksonvıll qalasynyń meri Lennı Karrı borttaǵy adamdardyń barlyǵy tiri ekenin jáne ushaqtyń kerosıni sýǵa tógilmes úshin tıisti sharalar qoldanatynyn málimdedi. Onyń aıtýynsha, AQSh prezıdenti Donald Tramp qońyraý shalyp, kómek usynǵan.
Bort «Miami Air International» jeke áýe jelisine tıesili. Boeing ókili kompanııa bul oqıǵadan habardar ekenin jáne sebebin anyqtaý úshin tolyq aqparat jınaıtynyn málimdedi.
Eske sala keteıik, 10 naýryz kúni tańerteń bortynda 157 adamy bar «Ethiopian Airlines» avıakompanııasynyń Boeing 737 MAX 8 ushaǵy Efıopııanyń Debre-Zeıt qalasyna jaqyn jerde apatqa ushyraǵan edi. Bul osy modeldi ushaqtardyń bes aı ishindegi ekinshi ret apatqa ushyraýy. Sondaı-aq, 2018 jyldyń 29 qazanynda Indonezııalyq Lion Air avıakompanııasynyń dál osyndaı laıneri apatqa ushyraǵan edi.
