AQSh-ta 11 qyrkúıek teraktisin uıymdastyrdy degen Mohammedtiń sot kúni belgilendi
ASTANA. KAZINFORM — Áskerı sýdıa sársenbi kúni 11 qyrkúıektegi teraktilerdi uıymdastyrdy dep aıyptalǵan adamnyń sot otyrysy 2028 jyldyń maýsym aıyna belgilengenin aıtty, dep habarlaıdy NBC News.
Halıd Sheıh Mohammed shabýyldarǵa qatysy bar basqa kúdiktiler Valıd bın Attash, Álı Abdýl Azız Álı jáne Mustafa Ahmed ál-Haýsavımen sot otyrysyna qatysady.
Mohammedke 2001 jyldyń 11 qyrkúıeginde Nıý-Iork qalasyndaǵy Dúnıejúzilik saýda ortalyǵyndaǵy teraktilerdi uıymdastyrdy degen aıyp taǵyldy. Onda urlanǵan ushaqtar Nıý-Iork pen Pentagondaǵy saýda úılerine shabýyl jasaǵan bolatyn. Taǵy bir ushaq Pensılvanııada egistikke qulady.
Áskerı sot sýdıasy, Áskerı-áýe kúshteriniń podpolkovnıgi Maıkl Shrama sársenbi kúni prokýrorlardyń sot otyrysyn 2027 jyldyń qańtaryna taǵaıyndaý týraly usynysyn keri qaıtaryp, sot otyrysyn 18 aıdan keıinge belgiledi.
Sot otyrysynyń kúni ótken jyldyń jazynda federaldy apellıatsııalyq sot Mohammedti ólim jazasynan bosatý úshin kinásin moıyndaýǵa múmkindik beretin kelisim qabyldanbaǵannan keıin jarııalandy.
2008 jyly Mohammedke 11 qyrkúıektegi shabýyldarda shamamen 3 000 adamnyń ólimine ákelgen qandy qylmys pen kisi óltirý aıyptary taǵyldy.
Mohammed pen basqa da kúdiktilerdi jaýapkershilikke tartý protsesi birneshe jylǵa sozyldy. Qorǵaýshy advokattardyń aıtýynsha, bul kidiris úkimettiń aıyptalýshylar Gýantanamoǵa aýystyrylǵanǵa deıin TsRÝ-dyń qupııa túrmelerinde olardyń qalaı azaptalǵany týraly málimetterdi jasyrýǵa tyrysýymen baılanysty.
Mohammed 2003 jyly Pákistanda tutqynǵa alynyp, úsh jyldan keıin Gýantanamoǵa aýystyryldy. 2014 jylǵy Senat esebinde TsRÝ Mohammed pen basqa da kúdiktilerge qarsy «kúsheıtilgen jaýap alý ádisterin» qoldanǵany anyqtaldy. Naqtyraq aıtqanda, Mohammedti 183 ret sýǵa tunshyqtyrǵan.
Buǵan deıin AQSh jalǵan neke shemasymen grın-karta taratqan 11 adamdy jaýapqa tartqanyn habarlaǵan edik.
