AQSh-ta 11 qyrkúıek qurbandaryn eske alýǵa arnalǵan moneta shyǵaryldy
ASTANA. KAZINFORM – AQSh Teńge saraıy 2001 jylǵy 11 qyrkúıektegi lańkestik shabýyldyń 25 jyldyǵyna oraı nomınaly 50 tsent bolatyn moneta shyǵardy, dep habarlaıdy AQSh Qarjy mınıstrligi.
Monetada shabýyl jasalǵan kún kórsetilgen arnaıy belgi jáne ony aınala «Eshqashan umytpaımyz» degen jazý ornalastyrylǵan.
— Shırek ǵasyr ótse de, qurbandar men olardyń otbasylaryna bergen ýádemiz ózgergen joq: biz eshqashan umytpaımyz, — dedi AQSh Qarjy mınıstri Skott Bessent.
Onyń aıtýynsha, monetany shyǵarý qaza tapqandardyń rýhyna taǵzym etýge, sondaı-aq óz ómirin qaterge tigip, ózgelerdi qutqarǵan adamdardyń erligin qurmetteýge arnalǵan.
Estelik moneta AQSh Teńge saraıynyń saıtynda aldyn ala tapsyrys berýge qoljetimdi.
Eske salaıyq, osydan týra 25 jyl buryn, 2001 jylǵy 11 qyrkúıekte Nıý-Iorkte lańkestik shabýyldar jasalyp, sonyń saldarynan Dúnıejúzilik saýda ortalyǵynyń qos munarasy qırady. Alaıda shırek ǵasyr ótse de, shabýyldardy uıymdastyrdy dep aıyptalǵan Halıd Sheıh Muhammedke qatysty negizgi sot protsesi áli bastalǵan joq. Onyń ústine bıylǵy tamyzda sot protsestiń bastalýyn taǵy da 2028 jylǵa qaldyrdy.
