AQSh stýdentterge vıza berý tártibin ózgertpek

ASTANA. KAZINFORM – AQSh prezıdenti Donald Tramptyń ákimshiligi úmitkerlerdiń áleýmettik jelilerin tekserýdi keńeıtý máselesin qarastyryp jatqandyqtan AQSh-ta stýdenttik vıza alý úshin jańa suhbattardy ýaqytsha toqtatýdy buıyrdy, dep habarlaıdy DW aqparat agenttigi.

Deutsche Welle-niń jazýynsha, bul týraly redaktsııanyń qolyna túsken qujatqa silteme jasap Politico basylymy habarlady.

Tilshilerdiń málimetinshe, Aq úı yqtımal shara retinde AQSh-ta bilim alǵysy keletinderdiń barlyǵynyń áleýmettik jelilerin mindetti túrde tekserýdi qarastyryp otyr. Atap ótilgendeı, bul qoldanystaǵy sharalardy «aıtarlyqtaı keńeıtý» bolady.

- Osyndaı tekseristerdi engizýge daıyndyq aıasynda ákimshilik AQSh elshilikteri men konsýldyqtaryna stýdenttik vızaǵa úmitkerlermen áńgimelesý sharalaryn josparlaýdy toqtatýdy buıyrdy, - dep jazdy Politico.

Tıisti jedelhatqa 27 mamyr, seısenbi kúngi AQSh Memlekettik hatshysy Marko Rýbıo qol qoıǵany aıtyldy.

Eske sala ketsek, Garvard ýnıversıteti 22 sáýirde AQSh-tyń federaldyq sotyna ýnıversıtet baǵdarlamalaryna bólingen 2 mlrd dollardan astam úkimettik qarjylandyrýdy toqtatqan Tramp ákimshiligine qarsy shaǵym túsirdi.

Buǵan deıin sot sheteldik stýdentter úshin kúreste ýnıversıtetti qoldaǵanyn jazǵan bolatynbyz.