AQSh soty Apple kompanııasyn patenttik quqyqtardy buzǵany úshin 625 mln. dollar tóleýge mindettedi
ASTANA. QazAqparat - Sot amerıkandyq Apple kompanııasyn VirnetX patent ustaýshy kompanııasyna oǵan tıesili tehnologııalardy zańsyz paıdalanǵany úshin 625 mln. dollar tóleýge mindettedi. Tehas shtatynda ótken tyńdaýlar kezinde federaldyq qazylar alqasy osyndaı sheshim shyǵardy.
Úkimnen kórinip turǵandaı, Apple VirnetX ıelengen birqatar patentterdi buzǵan. Atap aıtqanda, sot kalıfornııalyq korporatsııa FaceTime beıne qońyraýlary jáne iMessage shuǵyl habarlamalarmen almasý qyzmeti úshin qosymshalardy jasaýda VirnetX-ke jatatyn ıntellektýaldyq menshikti ruqsatsyz paıdalanǵan, degen sheshimge keldi.
VirnetX Apple-ge qatysty talap shaǵymdy birneshe jyl buryn bergen bolatyn. 2012 jyly sot kompanııanyń talaptaryn oryndy dep tanyp, Apple-di 368 mln. dollar tóleýge mindettedi. Kalıfornııalyq kompanııa osy jolǵy úkimge de shaǵym beretinin málimdedi. Intellektýaldyq menshikti lıtsenzııalaýmen aınalysatyn VirnetX kompanııasy Nevada shtatynda ornlasqan jáne ártúrli tehnologııalarǵa patentterdiń iri qorjynyn ıelengen. Budan buryn VirnetX Microsoft, Cisco sııaqty jáne basqa da kompanııalarmen sottasqan bolatyn, dep habarlady TASS.
