AQSh soty Tramptyń New York Times gazetine qarsy shaǵymyn ýaqytsha keıinge qaldyrdy

ASTANA. KAZINFORM – Amerıka prezıdenti gazetten «jala japqany» úshin 15 mıllıard dollar ótemaqy talap etti. Sýdıa onyń talabynyń tym uzaq ekenin aıtyp, Trampqa ony qysqartýǵa 28 kún berdi, dep jazady DW.

19 qyrkúıek kúni Florıda soty AQSh prezıdenti Donald Tramptyń New York Times gazetine qarsy mıllıard dollarlyq talap aryzyn ýaqytsha qanaǵattandyrmady. Sýdıa Stıven Merrıdeı 85 bettik shaǵym tym uzaq jáne protsessýaldyq talaptarǵa saı emes dep túsindirdi.

Osy aptanyń basynda Tramp New York Times gazeti men onyń birneshe jýrnalısine jala japty dep aıyptaǵanyn málimdedi. Ol gazet «qasaqana» ony 2024 jylǵy saılaý aldynda bedelin túsirýge áreket jasady dep aıyptady. 

Prezıdent shyǵyndy 15 mıllıard dollarǵa baǵalap otyr. 

Alaıda gazettegiler bul málimdemelerdi negizsiz dep sanaıdy.

– Aryzdyń zańdyq negizi joq jáne táýelsiz jýrnalıstıkany basyp-janshý áreketi, - dedi redaktsııa ókili.

Ol «Nıý-Iork Taıms» gazeti «qoryqpaı» jumysyn jalǵastyrady jáne jýrnalısterdiń «Amerıka halqynyń múddesi úshin» suraq qoıýǵa konstıtýtsııalyq quqyǵyn qorǵaıtynyn aıtty.

Tramptyń bul amerıkalyq BAQ-qa qarsy zańdy shara qoldanýy birinshi ret emes. Ol buǵan deıin CBS jáne ABC kompanııalaryna qarsy sotqa shaǵym túsirgen, nátıjesinde mıllıondaǵan dollarlyq esep aıyrysýlar bolǵan. Synshylar bul qadamdardy baspasóz bostandyǵyna jasalǵan shabýyl dep sanaıdy.

Budan erterek Tramp ózin synaıtyn telearnalardyń lıtsenzııasyn qaıtaryp alýdy usynǵan bolatyn.