AQSh soty Tramp engizgen 10 paıyzdyq baj salyǵyn zańsyz dep tanydy

Sot sheshimi ımporttyq tarıfterge qarsy shaǵym túsirgen eki shaǵyn kompanııanyń paıdasyna shyǵarylǵan.

Donald Tramp atalǵan baj salyǵyn 2025 jylǵy sáýirde jarııalanǵan jahandyq tarıfterdi Joǵarǵy sot joıǵannan keıin engizgen bolatyn.

Sot sheshimine pikir bildirgen Donald Tramp bul sheshimdi «radıkaldy solshyl eki sýdıa» qabyldaǵanyn aıtyp, ákimshiliktiń basqa jol tabatynyn málimdedi.

AQSh Ádilet mınıstrligi Bloomberg agenttiginiń saýalyna jaýap bermegen.

Talap-aryzdy eki shaǵyn kompanııa bergendikten, qazirgi tańda sot sheshimi tek solarǵa qatysty kúshinde. Basqa ımporttaýshylardyń bul sheshimdi paıdalana alatyny ázirge belgisiz.

Donald Tramp baj salyǵyn 1974 jylǵy Saýda týraly zańnyń 122-babyna súıene otyryp engizgen. Bul bap prezıdentke tólem balansynyń eleýli tapshylyǵy jaǵdaıynda 150 kúnge deıin 15 paıyzǵa deıingi baj salyǵyn engizýge múmkindik beredi.

Alaıda talapkerler AQSh-taǵy saýda tapshylyǵy men tólem balansynyń daǵdarysy eki bólek uǵym ekenin alǵa tartqan. Sot zań normalaryn taldaı kele, osy ýájdi qoldaǵan.

We Pay the Tariffs qaýymdastyǵynyń málimetinshe, AQSh keden organdary tek naýryz aıynda atalǵan bap boıynsha 8 mlrd dollar kóleminde baj salyǵyn jınaǵan.

Talapkerlerdiń biri – Basic Fun kompanııasy osy baj salyǵy aıasynda 100 myń dollardan astam qarjy tólegen.

Kompanııa ókilderi sot sheshimin «ádil ári boljamdy saýda saıasatyna táýeldi shaǵyn bıznes úshin mańyzdy jeńis» dep atady.

Bul Donald Tramptyń tarıftik saıasatyna qatysty ekinshi iri soty sátsizdik bolyp otyr. Buǵan deıin 20 aqpanda AQSh Joǵarǵy soty prezıdenttiń halyqaralyq tótenshe ekonomıkalyq ókilettikter týraly zań negizinde engizgen tarıfterin de zańsyz dep tanyǵan edi.

Sol sheshimnen keıin ımporttaýshylar shamamen 170 mlrd dollardy qaıtarýǵa úmitker boldy. AQSh keden qyzmeti sáýir aıynyń sońynda arnaıy ótemaqy portalyn iske qosyp, alǵashqy tólemder osy aptada aýdaryla bastaǵan.