AQSh soty Sırııa túrmesiniń burynǵy basshysyn 60 jylǵa sottady
ASTANA. KAZINFORM — AQSh soty Sırııadaǵy áıgili túrmelerdiń birinde tutqyndardy azaptaý isine qatysty úkim shyǵardy, dep habarlaıdy Kazinform agenttiginiń menshikti tilshisi.
Los-Andjeles federaldyq soty Damask ortalyq túrmesiniń burynǵy bastyǵy Samır Ýsman ash-Sheıhti 60 jylǵa bas bostandyǵynan aıyrdy. Bul týraly SANA agenttigi AQSh Ádilet mınıstrligine silteme jasap habarlaıdy.
Ash-Sheıh 2005-2008 jyldary Sırııa prezıdenti Bashar Asadtyń bıligi tusynda Adra túrmesin basqarǵan.
A U.S. court sentenced Brig. Gen. Samir Ousman al-sheikh, a former director of Adra Central Prison under the deposed regime, to 60 years in prison after his conviction on torture and immigration fraud charges. #Syria #AdraPrison https://t.co/89hOxV6HW0 https://t.co/GANrW0LuCP
— SANA English (@SANAEnOfficial) September 18, 2026
Tergeý málimetterine sáıkes, ol Sırııa bıligine qarsy shyqqandardy basý úshin qyzmetkerlerine tutqyndarǵa fızıkalyq jáne psıhologııalyq zorlyq kórsetýge buıryq berip, keı jaǵdaılarda azaptaý áreketterine ózi de qatysqan.
Naýryz aıynda alqabıler 74 jastaǵy Ash-Sheıhti azaptaýǵa qatysty sóz baılasý jáne azaptaýdyń úsh deregi boıynsha kináli dep tanyǵan. Sotta burynǵy úsh tutqyn túrmede ózderine jáne basqa da tutqyndarǵa jasalǵan zorlyq-zombylyqty baıandady.
Ol sondaı-aq ımmıgratsııalyq alaıaqtyq jasaǵany úshin de kináli dep tanyldy. 2020 jyly AQSh-qa kelgen Ash-Sheıh vıza jáne turýǵa yqtııarhat alý kezinde Sırııadaǵy qyzmeti týraly jasyrǵan. Budan bólek Amerıka azamattyǵyn alýǵa ótinish bergende de jalǵan derek usynǵan.
Prokýratýra Ash-Sheıhti keminde 80 jylǵa bas bostandyǵynan aıyrýdy surady. Al qorǵaý tarapy sottalýshynyń jasy men densaýlyq jaǵdaıyn eskere otyryp, bes jyldyq jaza taǵaıyndaýdy talap etti. Buǵan deıin Ash-Sheıh óz kinásin moıyndamaǵan.
AQSh Ádilet mınıstrligi ony Sırııadan tys jerde jeke sottalyp, kináli dep tanylǵan Bashar Asad úkimetiniń burynǵy eń joǵary laýazymdy ókili dep atady.
Sáýirde Sırııa soty burynǵy prezıdent Bashar Asad pen onyń aǵasyna qatysty isti syrttaı qaraýǵa kiristi. Tamyz aıynda eks-prezıdentke ólim jazasy kesildi.
Buǵan deıin Sırııa demokratııalyq kúshteri ózin taratatynyn málimdegenin habarlaǵan bolatynbyz.
Aqzat Jıenalına
