AQSh soty Nıýsomnyń áskerılerdi qoldanýǵa tyıym salý týraly ótinishin qabyldamady

ASTANA. KAZINFORM – Sot Los-Andjelestegi narazylyqtardy basý úshin áskerılerdi paıdalanýǵa tyıym salý týraly shuǵyl ótinishti qanaǵattandyrmady, dep habarlaıdy Anadoly. 

AQSh-ta sýdıa Kalıfornııa shtatynyń gýbernatory Gevın Nıýsomnyń Los-Andjelestegi narazylyqtardy basý úshin áskerılerdi paıdalanýǵa tyıym salý týraly shuǵyl ótinishin qanaǵattandyrmady.

San-Frantsıskonyń Okrýgtik sotynyń aǵa sýdıasy Charlz Breıer Nıýsomnyń ótinishi boıynsha sheshim shyǵaryp, prezıdent Donald Tramptyń nusqaýymen Los-Andjeleske Ulttyq gvardııa men teńiz jaıaý áskerin engizýge baılanysty máseleni qarastyrdy. Bul sharalar zańsyz mıgranttardy qoldaǵan demonstratsııalardy basý maqsatynda qabyldanǵan edi.

Breıerdiń aıtýynsha, Tramp ákimshiligi, AQSh Qorǵanys mınıstrligi jáne vedomstvo basshysy Pıt Hegset óz ustanymdaryn usyný úshin qosymsha ýaqyt suraǵan. Olarǵa osy múmkindik berilip, sonyń negizinde sýdıa Nıýsomnyń shuǵyl ótinishin qabyldamaı tastady.

Іs boıynsha negizgi sot otyrysy erteńge belgilendi.

Buǵan deıin Nıýsom Tramp ákimshiligin áskerılerdi federaldyq quqyq qorǵaý kúshi retinde paıdalandy dep aıyptap, bul AQSh zańnamasy sheńberinen tys áreket ekenin aıtqan. Ol sot arqyly áskerılerdiń shtatta qoldanylýyn dereý toqtatýdy talap etken bolatyn.

Osy ýaqytta Los-Andjeleste AQSh-tyń Kóshi-qon jáne kedendik baqylaý qyzmeti (ICE) ustaǵan zańsyz mıgranttardy qoldaýǵa arnalǵan narazylyqtar jalǵasýda. Tramp ákimshiligi bul sherýlerge qatań jaýap qaıtardy.

Narazylyqtar kezinde ondaǵan adam ustalyp, polıtsııamen qaqtyǵystar oryn aldy, birneshe avtokólik órtenip, isten shyqty.

Prezıdent Tramp aldymen Los-Andjeleske 2 myń Ulttyq gvardııa sarbazyn jiberip, keıin taǵy 2 myń gvardııashy men 700 teńiz jaıaý áskerin qosymsha jiberetinin málimdedi.