AQSh soty Meta kompanııasyn 25 mlrd dollar tóleýge mindettedi
ASTANA. KAZINFORM — AQSh-tyń Nıý-Meksıko shtatynyń soty Facebook paıdalanýshylaryn jeke derekterin qorǵaý máselesinde jańylystyrǵany úshin Meta Platforms kompanııasyn 25 mlrd dollar tóleýge mindettedi, dep habarlaıdy Reuters.
Mundaı sheshimdi alqabıler kompanııany tutynýshylardyń quqyqtaryn qorǵaý týraly shtat zańnamasyn buzǵany úshin kináli dep tanyǵannan keıin sýdıa Frensıs Metıý shyǵardy.
Bastapqyda sýdıa óndirip alynatyn somany 219 mlrd dollardan astam dep baǵalaǵan. Alaıda keıin bul somany 25 mlrd dollarǵa deıin qysqartty.
Іs Facebook áleýmettik jelisiniń 87 mıllıonǵa deıingi paıdalanýshysynyń jeke derekterine olardyń kelisiminsiz qol jetkizgen brıtandyq Cambridge Analytica konsaltıngtik kompanııasyna qatysty daýmen baılanysty. Bul aqparat saılaýshylardyń qalaýyn taldaý jáne 2016 jyly Donald Tramptyń prezıdenttik naýqany kezinde saıası jarnamany maqsatty túrde taratý úshin paıdalanylǵan.
Meta kompanııasyna qarsy talap aryzdy Nıý-Meksıko shtatynyń bas prokýrory 2021 jyly bergen. Shtat bıligi kompanııany úshinshi tulǵalardyń paıdalanýshylardyń jeke derekterine qol jetkizý múmkindigi jáne mazmundy baqylaý saıasaty týraly shyndyqqa sáıkes kelmeıtin aqparat berdi dep aıyptady.
2026 jylǵy qyrkúıekte alqabıler kompanııa men onyń basshylyǵynyń 29 málimdemesiniń 26-syn jańylystyratyn aqparat dep tanydy. Jalpy alǵanda, shtattyń tutynýshylardyń quqyqtaryn qorǵaý týraly zańnamasyn buzýdyń 43 mıllıonnan astam jaǵdaıy anyqtaldy.
Nıý-Meksıko shtatynyń bas prokýrory Raýl Torres sot sheshimi AQSh tarıhynda jekelegen shtat deńgeıinde Meta kompanııasynan óndirip alynǵan eń iri somalardyń biri bolǵanyn málimdedi.
Nıý-Meksıko zańnamasyna sáıkes, óndirip alynǵan qarajat shtattyń mektep júıesin qarjylandyrýǵa baǵyttalýǵa tıis.
Reuters agenttiginiń habarlaýynsha, sarapshylar isti apellıatsııalyq satyda qaraý uzaqqa sozylady dep kútedi. Buǵan deıin Meta mundaı kólemdegi óndirip alý kompanııanyń konstıtýtsııalyq quqyqtaryn buzýy múmkin ekenin aıtyp, aıyppul mólsherin 3,45 mlrd dollarmen shekteýdi suraǵan.
2019 jyly AQSh Federaldyq saýda komıssııasy Cambridge Analytica tóńiregindegi osy daýǵa baılanysty Facebook kompanııasyna 5 mlrd dollar aıyppul salǵan.
Eske salaıyq, bıyl tamyzda Meta kompanııasy jasóspirimderdiń áleýmettik jelilerge táýeldiligine qatysty mańyzdy sot isin aıaqtaý jáne 47 shtat bergen talap aryzdardy retteý maqsatynda 17 mlrd dollar tóleýge ári Facebook pen Instagram qyzmetterinde balalardy qorǵaýdyń qosymsha sharalaryn engizýge kelisken bolatyn.
