AQSh soty Kýbanyń eks-basshysy Raýl Kastrony qamaýǵa alýǵa order berdi
ASTANA. KAZINFORM — Florıda shtatynyń soty Raýl Kastrony qamaýǵa alýǵa order berdi. Kýba Kommýnıstik partııasynyń burynǵy basshysy 1996 jyly Kýba áskerı ushaqtarynyń quqyq qorǵaý uıymyna tıesili eki ushaqty atyp túsirýi saldarynan AQSh azamattarynyń qaza tabýyna jaýapty dep aıyptalyp otyr. Bul týraly Kazinform agenttigi DW-ge silteme jasap habarlady.
Miami Herald gazetiniń málimetinshe, Florıda soty 2021 jylǵa deıin Kýba Kommýnıstik partııasy Ortalyq komıtetiniń birinshi hatshysy bolǵan 95 jastaǵy Raýl Kastrony qamaýǵa alýǵa order bergen. AQSh soty Raýl Kastronyń 1996 jyly Kýba barlaý qyzmetiniń agentterimen «birinshi dárejeli kisi óltirýdi uıymdastyrý maqsatynda sóz baılasqanyna» jetkilikti negiz bar ekenin málimdedi.
Oqıǵa 1996 jyly bolǵan. Sol kezde Kýba áskerı ushaqtary Florıda buǵazynyń ústinde Brothers to the Rescue gýmanıtarlyq uıymyna tıesili eki azamattyq Cessna ushaǵyn atyp túsirgen. Uıym músheleri teńizde apatqa ushyraǵan kýbalyq bosqyndardy izdep júrgen. Oqıǵa saldarynan AQSh-tyń úsh azamaty men Kýbanyń bir azamaty qaza tapty.
AQSh tarapy sol kezde Kýbanyń Qarýly kúshter mınıstri bolǵan Raýl Kastrony oqıǵaǵa tikeleı jaýapty dep esepteıdi. Sonymen qatar Kýbanyń eki tyńshysy Florıda shtatyndaǵy Maıamı men Kı-Ýest qalalarynda Brothers to the Rescue uıymyna enip, onyń músheleriniń ushýlary týraly málimetterdi Kýba bıligine jetkizgeni aıtylady.
AQSh úkimeti mamyr aıynda Raýl Kastroǵa resmı aıyp taqty. Kinási dáleldense, ol ómir boıyna bas bostandyǵynan aıyrylýy múmkin.
Raýl Kastro — Kýba revolıýtsııasyna qatysqan memleket jáne saıası qaıratker, Fıdel Kastronyń inisi. Ol 2008-2018 jyldary Kýba prezıdenti qyzmetin atqaryp, birneshe onjyldyq boıy eldiń saıası ómirinde mańyzdy ról atqardy.
Tramp Kýbaǵa qysym jasap, kelisimge kelýge úndedi
Qyrkúıek aıynyń sońynda BUU Bas Assambleıasynda sóılegen AQSh prezıdenti Kýbanyń jaǵdaıyn múshkil dep baǵalap, elde «bostandyq ornaıtynyn» ýáde berdi. Onyń sózinen keıin Kýba delegatsııasy otyrys zalynan shyǵyp ketti. Keıin Aq úı basshysy Kýba AQSh-pen kelisimge keledi jáne áskerı aralasýdyń qajeti bolmaıdy degen senim bildirdi.
AQSh Venesýelada áskerı operatsııa júrgizip, el basshysy Nıkolas Madýrony qolǵa túsirgennen keıin Venesýela Kýbaǵa munaı jetkizýdi toqtatty.
— Kýbaǵa budan bylaı munaı da, aqsha da kelmeıdi — nól. Olarǵa (Kýba bıligine. — red.) kesh bolmaı turǵanda kelisimge kelýge qatań keńes beremin, — dep eskertti Aq úı basshysy Madýro qolǵa túskennen keıin kóp uzamaı.
