AQSh soty Qazaqstandy qosa alǵanda, 75 elge vıza berýdi toqtatý sheshimin joıdy
ASTANA. KAZINFORM — Sot bul sheshim AQSh Memlekettik hatshysy Marko Rýbıonyń zańda belgilengen ókilettikterinen asyp ketkenin málimdedi, dep habarlaıdy Vashıngtondaǵy Kazinform agenttiginiń menshikti tilshisi US News basylymyna silteme jasap.
AQSh soty Tramp ákimshiliginiń 75 el azamattaryna ımmıgratsııalyq vıza berýdi ýaqytsha toqtatý týraly sheshiminiń kúshin joıdy. Manhettendegi AQSh okrýgtik sotynyń sýdıasy Djannet Vargas Memlekettik departament qańtarda jarııalaǵan bul saıasatty «zańsyz ekeni anyq» dep baǵalady. Onyń aıtýynsha, bul sheshim konsýldyq qyzmetkerlerdiń ımmıgratsııalyq vızalardy rásimdeý tártibin anyqtaý quqyǵyn Memlekettik hatshyǵa bermeıtin federaldyq ımmıgratsııalyq zańnamaǵa qaıshy keledi.
Memlekettik departamenttiń ótinishterdi qaraýdy toqtatý týraly sheshimi qańtarda kúshine engen bolatyn. Ol myna elderdiń azamattaryna qatysty boldy:
Aýǵanstan, Albanııa, Aljır, Antıgýa jáne Barbýda, Armenııa, Ázerbaıjan, Bagam araldary, Bangladesh, Barbados, Belarýs, Belız, Býtan, Bosnııa jáne Gertsegovına, Brazılııa, Mıanma (Bırma), Kambodja, Kamerýn, Kabo-Verde, Kolýmbııa, Kot-d’Ivýar, Kýba, Kongo Demokratııalyq Respýblıkasy, Domınıka, Mysyr, Erıtreıa, Efıopııa, Fıdjı, Gambııa, Grýzııa, Gana, Grenada, Gvatemala, Gvıneıa, Gaıtı, Irak, Iran, Iordanııa, Kosovo, Kýveıt, Qazaqstan, Qyrǵyzstan, Laos, Lıvan, Lıberııa, Lıvııa, Moldova, Mońǵolııa, Marokko, Nepal, Nıkaragýa, Nıgerııa, Soltústik Makedonııa, Pákistan, Kongo Respýblıkasy, Reseı, Rýanda, Sent-Kıts jáne Nevıs, Sent-Lıýsııa, Sent-Vınsent jáne Grenadınder, Senegal, Serra-Leone, Somalı, Ońtústik Sýdan, Sýdan, Sırııa, Tanzanııa, Taıland, Togo, Týnıs, Ýganda, Ýrýgvaı, Ózbekstan, Iemen, ıAmaıka jáne Chernogorııa.
Qańtarda AQSh Memlekettik departamenti ótinish berýshilerdi irikteý jáne tekserý rásimderine jan-jaqty sholý júrgizip jatqanyn málimdegen. Vedomstvonyń aıtýynsha, mundaǵy maqsat — táýekeli joǵary elderden kelgen ımmıgranttardyń AQSh-ta áleýmettik járdemaqylardy zańsyz alýyna jol bermeý jáne olardyń qoǵamǵa salmaq túsirmeýin qamtamasyz etý.
Buǵan deıin AQSh Joǵarǵy soty Tramptyń jazýshy E. Djın Kerrollǵa tólenetin ótemaqynyń kúshin joıý týraly ótinishin qanaǵattandyrmaǵany habarlanǵan bolatyn.
