AQSh soty Djastın Baldonıdiń Bleık Laıvlıge qarsy 400 mıllıon dollarlyq talabyn qanaǵattandyrmady

ASTANA. KAZINFORM – AQSh-tyń federaldy sýdıasy akter ári rejısser Djastın Baldonıdiń áriptesi Bleık Laıvlıge qarsy túsirgen 400 mıllıon dollarlyq aryzyn keri qaıtardy. Bul týraly Anadoly BBC-ge silteme jasap, habarlady.

Nıý-Iorktiń Ońtústik okrýginiń federaldy sýdıasy Lıýıs Laıman 2024 jyly birge «Bári bizben bitedi» («It Ends With Us») fılminde oınaǵan Baldonı men Laıvlı arasyndaǵy iske qatysty sheshim shyǵardy.

Sýdıa Baldonıdiń Bleık Laıvlıge qarsy jala japty degen aıyppen talap etken 400 mıllıon dollarlyq ótemaqy talabyn negizsiz ári quqyqtyq turǵydan dálelsiz dep taýyp, qabyldamaı qoıdy.

Sottyń málimdeýinshe, Laıvlıdiń Baldonıge qatysty jynystyq qysym kórsetti degen aıyptaýlary pikir bildirý erkindigi aıasynda qorǵalady jáne sondyqtan olar úshin sot jaýapkershiligi kózdelmeıdi.

Sondaı-aq, Djastın Baldonıdiń The New York Times gazetine qarsy 250 mıllıon dollarlyq jala jabý týraly aryzy da qanaǵattandyrylmady. Sot gazettiń akterler arasyndaǵy janjal týraly jarııalanymdaryn «jýrnalıstiń erikti túrde jasaǵan reportajy» dep tanyp, qorǵalǵan dep sheshti.

Aıta keteıik, 2024 jyldyń jeltoqsanynda Bleık Laıvlı Djastın Baldonıge qarsy jynystyq qysym kórsetti jáne ony qaralaýǵa tyrysty dep aıyptap, sotqa júgingen edi. Buǵan jaýap retinde Baldonı bul aıyptaýlardy joqqa shyǵaryp, Laıvlı men onyń kúıeýine qarsy qarsy talap túsirgen bolatyn.

Eske sala keteıik, buǵan deıin frantsýz akteri Jerar Deparde 2021 jyly túsirilim alańynda eki áıelge seksýaldyq zorlyq jasaǵany úshin kináli dep tanylǵanyn jazǵan edik.