AQSh soty Aq úı mańyndaǵy bal zalynyń qurylysyn toqtatty
ASTANA. KAZINFORM — AQSh-tyń apellıatsııalyq soty Vashıngtondaǵy Aq úıdiń buzylǵan Shyǵys qanatynyń ornyna salynýy josparlanǵan aýmaǵy 8,36 myń sharshy metrlik bal zalynyń qurylysyn jalǵastyrýǵa salynǵan tyıymdy kúshinde qaldyrdy. Sot mundaı aýqymdy jobany júzege asyrý úshin Kongrestiń maquldaýy qajet ekenin málimdedi, dep habarlaıdy BBC.
Apellıatsııalyq alqanyń úsh sýdıasynyń ekeýi bul sheshimdi qoldady. Alaıda tyıym tek jerdiń ústindegi jumystarǵa qatysty. Jobanyń jerasty bóliginiń qurylysy ázirge jalǵasa beredi. Onda bombadan qorǵanatyn baspana jáne basqa da nysandar ornalastyrylmaq.
Daý Donald Tramp ákimshiligi Aq úıdiń Shyǵys qanatyn buzyp, Kongrestiń aldyn ala maquldaýynsyz qurylys jumystaryn bastaǵannan keıin týyndady. Jobaǵa qarsy AQSh-tyń tarıhı murasyn saqtaý jónindegi ulttyq qory sotqa shaǵym túsirdi.
Buǵan deıin federaldyq sot jerdiń ústindegi jumystardy júrgizýge tyıym salyp, ákimshilikke jerasty qurylysyn jalǵastyrýǵa ruqsat bergen. Apellıatsııalyq sot endi osy sheshimdi rastady.
Bolashaq bal zalynyń aýmaǵy shamamen 8 360 sharshy metr bolady. AQSh BAQ-tarynyń málimetinshe, jobanyń quny 400 mıllıon dollarǵa deıin ósken. Bul bastapqy esepten eki ese kóp.
Tramp ákimshiligine AQSh Joǵarǵy sotyna júginý úshin eki apta ýaqyt berildi. AQSh prezıdenti bul sheshimge shaǵymdanýǵa nıetti ekenin málimdedi.
Aq úı ákimshiligi sot tyıymy ulttyq qaýipsizdik múddelerine áser etedi dep sanaıdy. Ádilet mınıstrligi de jobany jeke tulǵalar qarjylandyryp otyrǵanyn, sondyqtan sottar onyń júzege asýyna aralaspaýy tıis ekenin alǵa tartady.
Ákimshilik ókilderi Shyǵys qanatty jańǵyrtýdyń qajettiligin de atap ótti. Olardyń aıtýynsha, burynǵy qurylym prezıdent pen Aq úı qyzmetkerlerin yqtımal shabýyldardan jetkilikti deńgeıde qorǵamaǵan.
Buǵan deıin AQSh Senaty Tramptyń Aq úıdegi bal zalyna qarjy bólý týraly zań jobasyn qabyldamady.
