AQSh Soltústik Amerıkanyń eń úlken taýynyń atyn ózgertedi
ASTANA. QazAqparat - Aq úı Soltústik Amerıkanyń eń úlken Mak-Kınlı taýynyń ataýyn Denalı qylyp ózgertetinin málimdedi, dep habarlady Associated Press.
Taýdyń atyn ózgertý jaqyn arada AQSh prezıdenti Barak Obamanyń Alıaskaǵa resmı sapary barysynda júzege asady.
Mak-Kınlı taýy Alıaskada Denalı ulttyq saıabaǵynyń ortalyǵynda ornalasqan. Onyń bıiktigi 6168 metrdi quraıdy.
Bul jerde mekendegen atabask ındisteri bul shyńdy Denalı dep ataǵan. Ol "uly" degen uǵymdy bildiredi.
XIX ǵasyrdyń sońynda taýdy AQSh-tyń 25-shi prezıdenti Ýılıam Mak-Kınlıdiń qurmetine onyń esimimen ataǵan. Ogaıo shtatynyń, Mak-Kınlıdiń týǵan jeriniń saıasatkerleri taýdyń atyn ózgertýge qarsy shyqty.
