AQSh soqqydan keıin Iranmen kezdesýge daıyn - Marko Rýbıo

ASTANA. KAZINFORM – Memlekettik hatshy Marko Rýbıo AQSh-tyń Irannyń úsh ıadrolyq nysanyn bombalaǵan soń Iranmen kezdesýge daıyn ekenin málimdedi, dep habarlaıdy CBS News. 

Rýbıo «Face the Nation with Margaret Brennan» baǵdarlamasynda sóılegen sózinde Irandy dıplomatııany jalǵastyrýǵa shaqyryp, AQSh-tyń Iranǵa qarsy budan ári shabýyl jasaý jospary joq ekenin habarlady.

Rýbıonyń málimdeýinshe, AQSh mıssııasy «Iranǵa, Iran halqyna shabýyl jasaý emes. Bul rejımdi ózgertýge baǵyttalǵan qadam bolǵan joq. Bul qadam ıadrolyq qarý jasaý ambıtsııalarymen baılanysty úsh ıadrolyq nysandy joıýǵa baǵyttaldy jáne ol keshe oryndaldy».

- Endi ne bolatyny Irannyń ári qaraıǵy sheshimine baılanysty bolady. Olar dıplomatııa jolyn tańdasa, biz daıynbyz. Biz olar úshin de, Iran halqy úshin de, álem úshin de tıimdi mámile jasaı alamyz. Eger olar basqa joldy tańdasa, onyń saldary bolady, - dep habarlady Marko Rýbıo.

Rýbıo prezıdent Tramp áli de dıplomatııalyq joldy qoldaıtynyn aıtyp, AQSh-tyń Irandy ıadrolyq qarýǵa qatysty ambıtsııalarynan bas tartý týraly kelisimge kelýge ıtermelegenin atap ótti.

- Eger olar qońyraý shalyp, «Biz kezdesip, sóıleskimiz keldi» dese, biz solaı isteýge daıynbyz, - dep habarlady Memlekettik hatshy.

Sonymen birge Rýbıo Iranǵa mańyzdy Ormýz buǵazyn jabý Iran rejımi úshin «ózine qol jumsaý» áreketi bolatynyn eskertti.

- Bul (Irannyń) óz-ózine qol jumsaý áreketi bolar edi, óıtkeni meniń oıymsha, eger olar muny istese, búkil álem olarǵa qarsy shyǵady, - dep málimdedi Marko Rýbıo.

Buǵan deıin Irannyń syrtqy ister mınıstri Máskeýge kelgenin jazǵan bolatynbyz.