AQSh Sırııany terrorızmdi qoldaıtyn elder tiziminen shyǵarýdy josparlap otyr
ASTANA. KAZINFORM – AQSh prezıdenti Donald Tramp Kongreske Sırııany terrorızmdi qoldaıtyn memleketter tiziminen shyǵarý nıeti týraly habarlady, dep habarlaıdy Kazinform agenttiginiń aǵylshyn redaktsııasy.
AQSh memlekettik hatshysy Marko Rýbıonyń aıtýynsha, sheshim mindetti 45 kúndik aldyn ala habarlaý merzimi aıaqtalǵannan keıin kúshine enýi múmkin jáne Vashıngton men Damask arasyndaǵy qarym-qatynasty qalpyna keltirý jolyndaǵy mańyzdy qadam bolmaq.
– Búgin prezıdent Tramp Kongreske ákimshiliginiń Sırııany terrorızmdi qoldaıtyn memleket mártebesinen shyǵarý nıeti týraly habarlady. Bul – prezıdent Tramptyń sırııalyqtarǵa jańa bolashaqqa múmkindik beretin taǵy bir tarıhı qadamy, – dedi Rýbıo.
Onyń sózinshe, Sırııany tizimnen shyǵarý birqatar shekteýlerdi alyp tastaýǵa, halyqaralyq saýda men ınvestıtsııa tartýǵa, eldi qalpyna keltirý úderisin jedeldetýge múmkindik beredi.
– Turaqty ári birtutas, ózimen jáne kórshilerimen beıbit ómir súretin Sırııa tek óńirdiń ǵana emes, búkil álemniń múddesine saı keledi, – dedi memlekettik hatshy.
AQSh Memlekettik departamentiniń málimetinshe, bul sheshim Donald Tramptyń 2025 jylǵy 30 maýsymdaǵy Sırııaǵa qatysty sanktsııalardy jeńildetý týraly jarlyǵynyń jalǵasy bolyp otyr.
Vashıngton Sırııa prezıdenti Ahmed ash-Sharaa bastaǵan úkimettiń terrorızmge qarsy qabyldaǵan sharalaryn, sondaı-aq Damasktiń halyqaralyq terrorıstik uıymdarǵa qoldaý kórsetýdi toqtatý jónindegi resmı kepildikterin eskergen.
Buǵan deıin Tramp Ankarada ótken NATO sammıti aıasynda Ahmed ash-Sharaamen kezdesken bolatyn. Jýrnalısterdiń Sırııany atalǵan tizimnen shyǵarý múmkindigi týraly suraǵyna AQSh prezıdenti: «Meniń oıymsha, ıá. Nege bolmasqa? Ol keremet jumys atqardy», – dep jaýap bergen.
Sırııa AQSh-tyń terrorızmdi qoldaıtyn memleketter tiziminde 1979 jyldan beri tur. Bul mártebe amerıkalyq kómek kórsetýge, qarjylyq operatsııalar men ınvestıtsııalarǵa birqatar shekteý qoıady.
Sheshim AQSh Kongresindegi mindetti qaraý kezeńinen keıin kúshine enedi.
Aıta keteıik, Makron bılik aýysqannan beri Sırııaǵa barǵan EO-daǵy alǵashqy memleket basshysy boldy.
