AQSh Sırııaǵa qarsy sanktsııalardy toqtatpaq

ASTANA. KAZINFORM — AQSh prezıdenti Donald Tramp Sırııaǵa salynǵan sanktsııalardy alyp tastaý týraly prezıdenttik jarlyqqa qol qoıady. Bul týraly Aq úı habarlady, dep jazady Anadoly.

Aq úıdiń baspasóz hatshysy Karolın Lıvıtt kúndelikti baspasóz konferentsııasynda málimdeme jasady.

Lıvıtt AQSh-tyń Sırııaǵa qarsy sanktsııalar baǵdarlamasyn toqtatý týraly jarlyqqa Tramp qol qoıatynyn málimdegen.

— Bul — eldiń turaqtylyq pen beıbitshilik jolyna túsýine qoldaý kórsetýge baǵyttalǵan áreket, — dedi Aq úıdiń baspasóz hatshysy.

Tramptyń jarlyǵyna qatysty pikir bildirgen Lıvıtt tek Sırııaǵa qatysty sanktsııa alynatynyn naqtylady.

— Jarlyq Sırııaǵa qarsy sanktsııalardy alyp tastaıdy, biraq eldiń burynǵy prezıdenti Bashar Asad, onyń jaqtastary, adam quqyqtaryn buzýshylar, esirtki saýdasymen aınalysatyndar, hımııalyq qarý jasaýǵa qatysy bar tulǵalar, DAISh pen onymen baılanysy bar uıymdar, sondaı-aq Irannyń proksı toptaryna qatysty sanktsııalar kúshinde qalady, — dedi ol.

Sondaı-aq ol Tramptyń Taıaý Shyǵysqa jasaǵan sapary barysynda Sırııanyń jańa basshysymen kezdesip, sanktsııalardy alyp tastaýǵa ýáde bergenin eske saldy.

— Prezıdent turaqty, birtutas jáne ózimen de, kórshilerimen de tatý ómir súretin Sırııany qoldaýǵa beıildi, — dep túıindedi Aq úı ókili.

Budan buryn Senat Tramptyń memlekettik shyǵystardy qysqartý týraly zańyna daýys bergeni habarlandy.