AQSh Sırııadaǵy qaqtyǵysty toqtatýǵa ýáde berdi

ASTANA. KAZINFORM – Vashıngton Sırııadaǵy drýzdar qaýymyna qatysty týyndaǵan qaqtyǵysty retteý boıynsha kelisim jasalǵanyn jarııalady. AQSh drýzdardy qorǵaýǵa kirisken Izraıldi sheginýge shaqyrdy, dep habarlaıdy Euronews.

AQSh memlekettik hatshysy Marko Rýbıo Sırııadaǵy qaqtyǵysqa qatysýshy taraptar deeskalatsııa jolynda naqty áreket týraly ýaǵdalasqanyn habarlady. Ol bul kelisimder jaqyn arada júzege asady degen úmitin bildirdi.

Al Axios aqparat resýrsy óz derekkózderine súıene otyryp, AQSh-tyń Sırııa boıynsha arnaıy ókili Izraıl premer-mınıstri Bınıamın Netanıahýdyń keńsesimen jaǵdaıdy talqylaǵanyn jáne «ızraıldikterdi sheginýge shaqyrǵanyn» jazdy.

Eske sala keteıik, Izraıl Qarýly kúshteri (TsAHAL) Sırııa prezıdentiniń Damaskidegi keshenine jáne eldiń ońtústigindegi nysandarǵa soqqy jasaǵan bolatyn. Bul shabýyldar Es-Sýveıda provıntsııasynda bedýınder men olardy qoldaǵan úkimet áskeri jáne drýzdar arasyndaǵy qaqtyǵys aıasynda boldy.

Izraıldiń qorǵanys mınıstri Israel Kats Sırııa drýzdarǵa tıise beretin bolsa, «aýyr zardap shegetinin» eskertti. Al Izraıldiń Syrtqy ister mınıstrligi sońǵy jarty jylda Sırııada keıbir az ulttarǵa qatysty – atap aıtqanda, alavıtterge qarsy jappaı qyrǵyn men kúrdterge baǵyttalǵan jaýlyq áreketter kúsheıgenin málimdedi. Osyǵan baılanysty Izraıl armııasy Sırııamen shekaralas aımaqtarda kúshterin kóbeıtip jatqanyn jarııa etti.

Ýaqytsha Sırııa prezıdenti Ahmad ál-Sharaa kórshiles eldiń áreketin qatań aıyptady. Onyń aıtýynsha, Izraıl el ishine iritki salýdy kózdep otyr. Sonymen qatar ol drýzdardy qorǵaý – óziniń basty mindeti ekenin atap ótti.

Osy ýaqytta Adam quqyqtary jónindegi Sırııalyq baqylaý keńesiniń (SOHR) belsendileri Sırııa bıligin Es-Sýveıdadaǵy tártipsizdikterdi basý kezinde beıbit turǵyndardy jazalaǵany úshin aıyptady. Uıymnyń habarlaýynsha, atalǵan qaqtyǵysta barlyq taraptardan barlyǵy 350 adam qaza tapqan.

Buǵan deıin Sırııa bıligi Es-Sýveıda provıntsııasynan ásker shyǵarýdy bastaǵany habarlanǵan bolatyn.